Մարիո Դրագին ԵՄ-ին կոչ է արել արտաքին քաղաքական որոշումներ կայացնելիս հրաժարվել միաձայնության պահանջից

Իտալիայի վարչապետ Մարիո Դրագին ԵՄ-ին կոչ է արել արտաքին քաղաքական որոշումներ կայացնելիս հրաժարվել միաձայնության պահանջից, գրում է FT-ն։

Եվրախորհրդարանում իր ելույթում Դրագին ասել է, որ ԵՄ-ն պետք է բարելավի որոշումներ կայացնելու իր կարողությունը՝ արդյունավետորեն արձագանքելու Ռուսաստանի կողմից առաջադրված մարտահրավերին, որը, նրա խոսքով, ուղղակի հարձակում է ԵՄ ամենամեծ ձեռքբերման՝ մայրցամաքում խաղաղության ապահովման վրա:

Նա նոր ԵՄ-ի իր տեսլականն անվանել է «պրագմատիկ ֆեդերալիզմի» ձեւ, որը կներառի համատեղ որոշումների կայացումն այնպիսի ոլորտներում, ինչպիսիք են տնտեսությունը, էներգետիկան, պաշտպանությունը եւ արտաքին քաղաքականությունը: «Եթե դրա համար պահանջվում է ԵՄ պայմանագրերի փոփոխման գործընթաց սկսել, մենք պետք է ընդունենք դա»,- ասել է Դրագին, փոխանցում է Bloomberg-ը։

Ըստ նրա՝ Եվրոպային անհրաժեշտ է խորացնել պաշտպանական ինտեգրումն ու համակարգումը։

Նրա խոսքով՝ թեեւ ԵՄ անդամ երկրների ընդհանուր պաշտպանական ծախսերը մոտ երեք անգամ գերազանցում են Ռուսաստանի ծախսերին, ԵՄ-ում, ընդհանուր առմամբ, շահագործվում է 146 պաշտպանական համակարգ, ինչը դժվարացնում է համակարգումը: ԱՄՆ-ը, ընդհակառակը, շահագործում է սպառազինության ընդամենը 34 համակարգ։ Դրագին առաջարկել է ԵՄ-ին համաժողով անցկացնել՝ այս հարցը քննարկելու համար։

Դրագին կոչ է արել Եվրամիությանը միջոցներ ձեռնարկել էներգակիրների գների աճի ուղղությամբ՝ ասելով, որ անհրաժեշտ են «կառուցվածքային լուծումներ»: «Էներգիայի արժեքը հաջորդ Եվրոպական խորհրդի ուշադրության կենտրոնում կլինի: Մեզ անհրաժեշտ են վճռական եւ անհապաղ լուծումներ»,- ասել է նա՝ հավելելով, որ ԵՄ-ն COVID-19 համավարակի հետեւանքները պետք է հարմարեցնի ուկրաինական ճգնաժամի հետեւանքներին եւ էներգակիրների գների աճին։