Արտարժութային միջոցների առաջանցիկ աճ. ԿԲ նախագահը՝ դոլարի փոխարժեքի նվազման պատճառների մասին

Հայաստանում միջազգային այցելուների ներկայությամբ պայմանավորված՝ առկա է առաջարկի տեսանկյունից արտարժութային միջոցների առաջանցիկ աճ, ինչն էլ հանգեցրել է դրամի որոշակի ամրապնդմանը, այս մասին  «Արմենպրես»-ի հաղորդմամբ՝ https://armenpress.am/arm/news/1082285.html այս մասին ասել է ՀՀ ԿԲ նախագահ Մարտին Գալստյանն ասուլիսում՝ անդրադառնալով  դոլար-դրամի փոխարժեքի շուկայում վերջին շրջանում տեղի ունեցող զարգացումների, դոլարի փոխարժեքի նվազման վերաբերյալ հարցին:

Գալստյանը նախ կարևորել է հասկանալը, թե ինչո՞վ է պայմանավորված փոխարժեքի վարքագիծը, գործոնների ամբողջականությունը, որոնք բերում են փոխարժեք որոշակի դրսևորումներին:

«Մենք տեսնում ենք մի իրավիճակ, որ ՀՀ-ում ունենք միջազգային այցելուներ: ՀՀ-ում ստեղծվել է իրավիճակ, որ արտաքին պահանջարկը մեծացել է: Մեր ծառայությունների նկատմամբ կա որոշակի պահանջարկի աճ, որը ենթադրում է, որ մեր ծառայությունները դարձել են արտահանելի: Երբ այդ մարդիկ մեր հանգստի վայրերում կամ ռեստորաններում որոշակի ծախսեր են իրականացնում, դա ենթադրում է, որ դա արտահանման աճ է՝ ՀՀ վճարային հաշվեկշռի տեսանկյունից: Այդ իրավիճակը բերել է նրան, որ մենք ունենք արտարժութային միջոցների առաջանցիկ աճ՝ առաջարկի տեսանկյունից պահանջարկի նկատմամբ, որը հանգեցրել է դրամի որոշակի ամրապնդման»,- ասաց ԿԲ նախագահը:

Հասկանալու համար, թե այդ երևույթը որքանով է հիմնարար՝ Գալստյանը կարևոր համարեց իմանալը, թե այդ մարդիկ որքա՞ն են պլանավորում մնալ Հայաստանում, ինչպիսի՞ն կլինի նրանց վարքագիծը: Ըստ նրա՝ վերաֆինանսավորման տոկոսադրույքն անփոփոխ թողնելու ԿԲ խորհրդի որոշման հիմքում հենց նաև այդ մարտավարության էլեմենտն է, դեռևս պետք է տեսնել այդ միջազգային այցելուների վարքագիծը և նրանց վարքագծով դրդված տնտեսական հետևանքները, որոնք կլինեն ՀՀ տնտեսությունում, որի արտացոլումը տեսանելի կլինի նաև փոխարժեքի մեջ:

Քանի որ Հայաստանում փոխարժեքն ազատ լողացող է, ԿԲ նախագահը զերծ մնաց գնահատականներ տալուց, թե ե՞րբ կվերականգնվի կամ ի՞նչ մակարդակի կհասնի: