Ռուսաստանը նոր հարված է նախապատրաստում. ՆԱՏՕ-ի գլխավոր քարտուղար

Ռուսաստանը չի հրաժարվել Ուկրաինան օկուպացնելու ծրագրերից և վերախմբավորվելուց հետո իր հարվածները կկենտրոնացնի արևելքում ու հարավում. ասել է ՆԱՏՕ-ի գլխավոր քարտուղար Իենս Ստոլտենբերգը։

«Առաջիկա շաբաթների ընթացքում մենք սպասում ենք, որ ռուսական զորքերը կփորձեն առաջխաղացում իրականացնել Ուկրաինայի արևելյան և հարավային մասերում, որպեսզի գրավեն ամբողջ Դոնբասը և ցամաքային միջանցք ստեղծեն դեպի օկուպացված Ղրիմ: Այսպիսով՝ պատերազմը թեւակոխել է կրիտիկական փուլ»,- ասել է Ստոլտենբերգը։

Նա հավելել է, որ Բուչայի ողբերգությունը դժվար թե ռազմական հանցագործությունների եզակի փաստ լինի:

«Երբ և եթե նրանք նահանջեն, և ուկրաինական զորքերը վերադարձնեն տարածքը, ես վախենում եմ, որ նրանք այնտեղ կգտնեն զանգվածային գերեզմաններ, վայրագությունների և ռազմական հանցագործությունների նոր ապացույցներ», - ասել է Ստոլտենբերգը մամուլի ասուլիսում։

Նա վերահաստատել է ՆԱՏՕ-ի խոստումը՝ շարունակել աջակցել Ուկրաինային։