ՆԱՏՕ-ի գլխավոր քարտուղարն ընդգծել է՝ ՆԱՏՕ-Հայաստան, ՆԱՏՕ-Ադրբեջան հարաբերությունները պայմանավորված չեն ԼՂ հակամարտությամբ

ՆԱՏՕ-ի Խորհրդարանական վեհաժողովում ՀՀ ԱԺ պատվիրակության ղեկավար Կորյուն Նահապետյանն այսօր լրագրողներին ասաց, որ Ստամբուլում կայացած` ՆԱՏՕ-ի ԽՎ այս նստաշրջանի ընթացքում ադրբեջանցի պատվիրակները մի քանի անգամ փորձել են ստեղծել այնպիսի իրավիճակ, որ ցույց տան, թե Հայաստանն օկուպացրել է իրենց տարածքը: «Անգամ լիագումար նիստի ընթացքում ՆԱՏՕ-ի գլխավոր քարտուղար Իենս Սթոլթենբերգին ուղղված հարցում փորձեցին ևս մեկ անգամ իրավիճակը խառնել և այնպիսի տպավորություն ստեղծել, որ այս հակամարտությունը Հայաստանի և Ադրբեջանի միջև է, որ տարածքային խնդիր է, տարածքային ամբողջականության հետ կապված որոշակի հարցադրումներ կան, ինչին գլխավոր քարտուղարը շատ հստակ պատասխանեց, որ ՆԱՏՕ-ի որոշումն այս մասով չի փոխվել` որևէ մասնակցություն չունի այս հակամարտության կարգավորման հարցում, ողջունում է ԵԱՀԿ ՄԽ համանախագահների ձևաչափով իրականացվող գործընթացը, և գլխավոր քարտուղարն առաջին անգամ ընդգծեց, որ ՆԱՏՕ-Հայաստան և ՆԱՏՕ-Ադրբեջան հարաբերությունները որևէ կերպ պայմանավորված չեն ԼՂ հակամարտությամբ, և սա հստակ դիրքորոշում է»,- ասաց Նահապետյանը՝ հավելելով. «Երբ ադրբեջանցի պատվիրակը դիմեց գլխավոր քարտուղարին և կոչ արեց ականջակալը դնել, սակայն գլխավոր քարտուղարը, իմանալով, թե գլխավոր հարցադրումները որոնք են, միանգամից հնչեցրեց պատասխանը, որը հստակ էր և սպառիչ»: