Վահե Վայանի «Ծուռ տունը» վիպակը կդրվի ընթերցողի սեղանին

Ժամանակակից գրող Վահե Վայանի անդրանիկ՝ «Ծուռ տունը» վիպակը կդրվի ընթերցողի սեղանին։ Մարտի 12-ին՝ ժամը 18:00-ին, «Դարան» գրախանութում կկայանա գրքի շնորհանդեսը։ 

«Ծուռ տունը» վիպակի հերոս Վ-ն ապրում է մի խեղաթյուրված աշխարհում, որն օտար է նրա համար և ոչ ընկալելի։ Սակայն նույն կերպ նա էլ այդ աշխարհին է թվում մի անընկալելի երևույթ, որը պետք է ձևափոխել ու հարմարեցնել ընդհանուրի պատկերացումներին, ընդ որում՝ դա պետք է անել ցանկացած գնով՝ Վ-ին ճզմելու, նվաստացնելու, մերժելու, հեգնելու․․․ 

Ո՞րն է այս աշխարհում ճակատագրի բերմամբ հայտնված միայնակ հերոսի դիմակայման միջոցը․ աշխարհ, որտեղ մարդկանց անուններն անգամ այլևս ոչինչ չեն ասում և ամփոփված են մեկ տառի մեջ։ Վ-ն, ինչպես իրենից առաջ ծնված ու իրենից հետո ծնվելիք բոլոր անհատականությունները, կանգնած է հավերժական ընտրության առաջ՝ հանձնվել հոսանքին կամ կռիվ տալ սեփական տեսակի գոյության համար։ 

Ամենաանհավանական միջոցներով, ամենատարօրինակ տրամաբանությունը գործի դնելով, ինքն իրեն ցավ պատճառելով, բայց չհարմարվելով․․․