Ուկրաինայի իշխանությունները գործողությունների ծրագիր ունեն, եթե Զելենսկին սպանվի. Բլինքեն

ԱՄՆ պետքարտուղար Էնթոնի Բլինքենը հայտարարել է, որ ուկրաինացիներն ունեն «իշխանության շարունակականության» ծրագիր, եթե Ուկրաինայի նախագահ Վլադիմիր Զելենսկին սպանվի։ Այս մասին նա ասել է կիրակի CBS «Face the Nation» հաղորդմանը տված հարցազրույցում։

«Ուկրաինացիներն ունեն պլաններ, որոնց մասին ես չեմ խոսի և չեմ մանրամասնի, որպեսզի համոզվեմ, որ կա կառավարման շարունակականություն՝ այս, թե այն մեթոդով»,- ասել է Բլինքենը։

Նա նաև գովաբանել է Զելենսկիին այս պատերազմում նրա առաջնորդության համար։

«Առաջնորդությունը, որը ցույց տվեց նախագահ Զելենսկին, դրսևորվել է ողջ կառավարության կողմից, հրաշալի է, նրանք դարձել են այս անհավանական խիզախ ուկրաինացի ժողովրդի մարմնավորումը»,- ասել է Բլինքենը:

Միաժամանակ, նա վստահություն է հայտնել, որ Ռուսաստանի առաջնորդ Վլադիմիր Պուտինը «դատապարտված է պարտության»։

«Միայն ճակատամարտում հաղթելը պատերազմում հաղթել չէ: Քաղաքը վերցնելը չի նշանակում, որ նա վերցրել է ուկրաինացի ժողովրդի սրտերն ու մտքերը»,- ասել է ԱՄՆ պետքարտուղարը։