Կմշակվի աշխատանքի վրա հիմնված ուսուցման 2018-2020թթ. զարգացման գործողությունների ծրագիր

Եվրոպական կրթական հիմնադրամի նախաձեռնությամբ Աղվերանում կայացել է  «Հայաստանում աշխատանքի վրա հիմնված ուսուցման (ԱՈՒՀ) 2018-2020թթ. զարգացման գործողությունների ծրագիր» խորագրով երկօրյա աշխատաժողովը, որին մասնակցել են ՀՀ կրթության և գիտության, աշխատանքի և սոցիալական հարցերի նախարարությունների, գործատուների ներկայացուցիչներ, ինչպես նաև նախնական և միջին մասնագիտական ուսումնական հաստատությունների տնօրեններ:

ՀՀ ԿԳՆ նախնական/արհեստագործական և միջին մասնագիտական կրթության վարչության պետ Արտակ Աղբալյանը նշել է, որ Եվրոպական կրթական հիմնադրամի վերջին 14-15 տարիների ընթացքում հանդիսացել է ՄԿՈՒ ոլորտի հիմնական դոնորներից մեկը. գրեթե ամեն տարի հիմնադրամի հետ իրականացվել են համատեղ ծրագրեր: 

«Այս տարի մեկնարկում է նոր ծրագիր 2018-20թթ.-ի համար, որը վերաբերում է աշխատանքի վրա հիմնված ուսուցմանը: Սա նորություն չէ ՄԿՈՒ համակարգում, քանի որ այս սեպտեմբերից GIZ-ի աջակցությամբ արդեն չորս հաստատությունում փորձնական ներդրվել են դուալ կրթության տարրեր: Իհարկե, դժվար է լինելու եվրոպական  փորձն ամբողջությամբ տեղայնացնել Հայաստանում: Դրա համար ձևավորված աշխատանքային խմբերը կմշակեն ուսումնական պլաններ և չափորոշիչներ:  Մեկնարկող ծրագիրը հիմնականում ուղղված է կարիքների գնահատման և գործատուների հետ աշխատանքի ակտիվացմանը, ոչ միայն ֆորմալ, այլ նաև ոչ ֆորմալ կրթության իրականացմանը:  Դրանով է պայմանավորված, որ այսօրվա հանդիպմանը ներկա են նաև գործատուների և շահագրգիռ կազմակերպությունների ներկայացուցիչներ:  Ծրագրի մյուս բաղադրիչը վերաբերում է ուսումնական հաստատությունների ներսում ձեռնարկությունների հիմնմանը, որը հաստատություններին հնարավորություն կտա ձևավորել արտաբյուջե: Ներկայումս հանրապետության 5 հաստատությունում գործում են նման ձեռնարկություններ, որը կարող է վերոնշյալ փորձի տարածման  լավ նախադրյալ հանդիսանալ»,-նշել է Արտակ Աղբալյանը:

ՄԿՈՒ-ի մեջ մասնավոր ոլորտի ներգրավման գծով ԵԿՀ մասնագետ Դիդիյե Ժիլբերի խոսքով` ՄԿՈՒ ոլորտի հիմնական շահառուների մասնակցությամբ սահմանվել են աշխատանքի վրա հիմնված ուսուցման հիմնական մարտահրավերները՝ գործատուների շահագրգռվածության պակաս, ֆինանսական և ոչ-ֆինանսական խրախուսում, պրակտիկաների որակ, աշխատանքի վրա հիմնված կրթության կանոնակարգման շրջանակ, դուալ կրթության հայկական մոդելի մշակում, տնտեսության ոլորտներ դուալ կրթության փորձնական ներդրման համար: Նրա խոսքով` այս աշխատաժողովի նպատակն է ձևավորել աշխատանքի վրա հիմնված ուսուցման կարիքների և պահանջարկի միասնական մոտեցում, հաստատել դրա հետագա զարգացման առաջնահերթությունները, ինչպես նաև նախաձեռնել. Հայաստանում աշխատանքի վրա հիմնված ուսուցման 2018-2020թթ. զարգացման գործողությունների ծրագրի մշակման աշխատանքները:  

Աշխատաժողովի ընթացքում ՀՀ աշխատանքի և սոցիալական հարցերի նախարարության Զբաղվածության պետական գործակալության պետի տեղակալ Արտակ Սիմոնյանը ներկայացրել է գործակալության տեսակետը  Հայաստանում Աշխատանքի վրա հիմնված ուսուցման զարգացման վերաբերյալ: Գյումրու թիվ 4 արհեստագործական պետական ուսումնարանի տնօրեն Քնարիկ Ահարոնյանն անդրադարձել է ՄԿՈՒ ուսանողի որակյալ պրակտիկայի կազմակերպման խնդիրներին ու մարտահրավերներին, «Մասնավոր հատվածի զարգացում և մասնագիտական կրթություն և ուսուցում Հարավային Կովկասում» նախագծի փորձագետ Յուլիա Ստակյանը` դուալ կրթության ներդրմանը Հայաստանում, իսկ Save the Children Հայաստան-ի փորձագետ Անահիտ Երնջակյանը ներկայացրել է  ձեռնարկատիրությունը և աշխատանքի վրա հիմնված կրթությունը ՄԿՈՒ ոլորտում` «Սոցիալական նորարարություններն արհեստագործական կրթության և հաշմանդամություն ունեցող անձանց աշխատանքի տեղավորման համար Սյունիքի մարզում» նախագծի համատեքստում:

Զեկույցներին հաջորդել են խմբային քննարկումներ և փորձի փոխանակում հետևյալ թեմաներով` աշխատանքի վրա հիմնված կրթության նախընտրելի տեսակները Հայաստանի համար, ԱՀՈՒ մանկավարժական շրջանակը, Ֆինանսական խթաններ ԱՀՈՒ զարգացման համար և իրավական շրջանակ՝ աջակցելու ԱՀՈՒ ներդրմանը և զարգացմանը:

Աշխատաժողովի երկրորդ օրն ամփոփվել են կատարված աշխատանքները, ինչպես նաև տեղի է ունեցել Հայաստանում աշխատանքի վրա հիմնված ուսուցման 2018-2020թթ. զարգացման գործողությունների ծրագրի և ճանապարհային քարտեզի մշակման աշխատանքներ:

ՀՀ ԿԳՆ