կարևոր
4177 դիտում, 1 տարի առաջ - 2023-02-04 12:31
Քաղաքական

Ամենավտանգավորն այն է, որ պետական մակարդակով գործողությունների ծրագիր չկա․ Գառնիկ Դանիելյան

Ամենավտանգավորն այն է, որ պետական մակարդակով գործողությունների ծրագիր չկա․ Գառնիկ Դանիելյան

«Ակտիվ աշխատանք է տարվում Լաչինի միջանցիք բացման համար։ Աշխատում ենք նաև միջազգային կառույցների հետ՝ Հայ Դատի գրասենյակի միջոցով։ Փորձում ենք գտնել ելք, որ արցախահայերը քիչ տառապեն։ Շուրջօրյա քննարկումներ են, ու նաև հումանիտար օգնության հարցն է կարևոր։ Երկու օր առաջ կարողացանք 10 տոննա բեռ հասցնել Արցախ»,- Oragir․News-ի հետ զրույցում ասաց ԱԺ «Հայաստան» խմբակցության պատգամավոր Գառնիկ Դանիելյանը։ 

ԱԺ պատգամավորը հայտնում է՝ սննդի հետ կապված խնդիները լուծվում են նաև ռուս խաղաղապահների միջոցով։ 

«ՀՕՄ-ը իր ներդրումն ունի, և այս պարագայում դեղորայքի, սննդի, մանկական կաթնախառնուրդների հարցը անհրաժեշտություն է։ Ես ուզում եմ շեշտել՝ արցախցին չպետք է լքի Արցախը։ Մարդիկ պետք է դիմանան ու մնան իրենց տներում․ սա ամենակարևորն է։ Պետք է պատրաստենք փաթեթ, որը իրականում կառավարության ֆունկցիան է, սակայն քննարկման ժամանակ չկա։ Արագ պետք է վերականգնվի Արցախի գյուղատնտեսությունը։ Ինֆորմացիա ունեմ, որ անասունների սպանդ է տեղի ունենում։ Մարդիկ ստիպված գնում են այդ քայլին։ Մենք Ռուբեն Վարդանյանի հետ էլ քննարկման ենք գնում այդ մասով»,-հայտնում է ԱԺ պատգամավորը։ 

Նրա խոսքով՝ ապաշնորհ իշխանությունները կարող էին որոշակի և ազդեցիկ քայլեր անել, բայց չեն արել։ 

«Ամենավտանգավորն այն է, որ պետական մակարդակով գործողությունների ծրագիր չկա»,-ասում է Դանիելյանը։

Պատգամավորը ընդգծում է՝ ժողովուրդը Ադրբեջանի կազմում ոչ մի կերպ չի տեսնում Արցախը։

«Մենք փորձ ենք անում միասնական քննարկման դաշտ բերել Արցախի հարցով մտահոգ մարդկանց, որ կարողանանք ճիշտ որոշումների գալ։ Այս ամեն ինչը պետք է վերլուծենք, բացթողումները ու սխալները անալիզի պետք է ենթարկվեն։ Մեր առաջ դրված՝ իշխանափոխության նպատակը առաջնահերթ է։ Պետք է հասկանանք, թե որտեղ է թերացել խորհրդարանական ընդդիմությունը»,-ընդգծում է ԱԺ պատգամավորը։ 

Գառնիկ Դանիելյանը համայն հայությանը կոչ է անում․ «Հայաստան-Արցախ-Սփյուռք եռամիասնության շնորհիվ պետք է հաղթենք։ Արցախը պետք է գիտակցի, որ մենք միասնական ենք, և այս պատերազմը իր տրամաբանական ավարտին պետք է հասնի մեր հաղթանակով»։