ՏԵՍԱՆՅՈՒԹ. Ազա՛տ, մաքո՛ւր Հայաստան. Երեւանի թիվ 194 դպրոցի աշակերտների բողոքի ակցիան են անում

Արմեն Հովհաննիսյանի անվան թիվ 194 դպրոցի աշակերտների այսօր բողոքի ակցիա էին իրականացնում դպրոցի հարակից տարածքում՝ պահանջելով մաքուր պահել կրթական հաստատության տարածքը աղբից։

Yerkir.am-ի հետ զրույցում դպրոցի տնօրեն Նունե Մանուկյանն ասաց, որ սա իրազեկման դաս էր: Ակցիայի նպատակն էր տարածքն աղբանոցի վերածող մեծահասակներին կոչ անել ոչ միայն մաքուր պահել Երեւանը, այլ նաեւ իրենց դպրոցի տարածքը:

«Երեխաներն այստեղ կրթություն են ստանում, իսկ հարակից կանգառներում երթուղայինի սպասելիս մարդիկ աղտոտում են տարածքը՝ աղբը ճաղավանդակներից ներս նետելով: Մտահղացումը երեխաներինն էր, որովհետեւ հաճախ աղբը հենց իրենք են հավաքում: Մենք էլ որոշեցինք ականջալուր լինել երեխաներին խնդրանքին եւ այս ֆորմատով իրազեկման դաս անցկացնել: Երեխաները դպրոցի տարածքում դասերից հետո էլ են ժամանակ անցկացնում եւ  տեսնում մեծահասակների կողմից անհարգալից վերաբերմունք կրթության նկատմամբ: Եթե աղբը թափում են դպրոցի տարածքում, շատ լավ հասկանալով, որ դպրոց է, ստացվում է, որ նույն վերաբերմունքն ունեն նաեւ դպրոցի նկատմամբ»,-  ընդգծեց տնօրենը։

Դպրոցի ուսուցիչների գլխավորությամբ՝ երեխաները շրջեցին կրթօջախի հարակից տարածքում, շենքերի բակերում, հավաքեցին աղբը, իրազեկման թռուցիկներ բաժանեցին մարդկանց:

Աղբամաններ տարածքում քիչ են, ինչն էլ նպաստում է, որ կանգառներում կանգնող մարդիկ ալարեն մի քանի քայլ այն կողմ դրված աղբամանի մեջ աղբը նետել: Քաղաքապետարանից խոստացել են, որ տարածքում կավելացնեն աղբամանների թիվը:

Նախկինում աղբաման դրված է եղել, կոտրել են: «Սա եւս օրինակ է փոքրերի համար: Այն, ինչ դրված է, պետք է պահել, պահպանել, ոչ թե փշրել»,- հավելեց Մանուկյանը:

Մանրամասն՝ տեսանյութում

Լ․Ս․