«Գորշ գայլերի» առաջնորդը հայտնել է, որ Էրդողանը 2023 թվականին կլինի Թուրքիայի նախագահի թեկնածուն

Թուրքիայի ներկայիս նախագահ Ռեջեփ Թայիփ Էրդողանը լինելու է Ժողովրդական (Cumhur) դաշինքի թեկնածուն 2023 թվականի նախագահական ընտրություններում. ասել է դաշինքի «Ազգային շարժում» կուսակցության ղեկավար Դևլեթ Բահչելին։

Երկրում հաջորդ համընդհանուր ընտրությունները՝ և՛ նախագահական, և՛ խորհրդարանական, տեղի կունենան Թուրքիայում 2023 թվականի հունիսին։ Իշխող «Արդարություն և զարգացում» (AKP) և «Ազգային շարժում» (MHP) կուսակցությունները նախկինում ստեղծել էին Ժողովրդական դաշինք:

«Մեր նախագահի թեկնածուն հայտնի է, Ռեջեփ Թայիփ Էրդողանն է: Ես հավատում եմ, որ պարոն Էրդողանը մեծ տարբերությամբ կհաղթի 2023 թվականի հունիսին կայանալիք ընտրություններում, և Ժողովրդական դաշինքը նույնպես նոր հաղթանակ կտանի»,- Բահչելիի խոսքերն է մեջբերում Star թերթը։ .

Հիշեցնենք, որ Ժողովրդական դաշինքի գլխավոր հակառակորդը Հանրապետական-ժողովրդական կուսակցության գլխավորած Ազգային (Millet) դաշինքն է: