Եթե ​​Ռուսաստանը հարձակվի Ուկրաինայի վրա, Թուրքիան հանդես կգա որպես ՆԱՏՕ-ի երկիր

Թուրքիան կշարունակի կատարել իր պարտավորությունները ՆԱՏՕ-ի շրջանակներում Ուկրաինա ռուսական ներխուժման դեպքում։ Այս մասին թուրքական NTV հեռուստաալիքին տված հարցազրույցում ասել է Թուրքիայի նախագահ Ռեջեփ Թայիփ Էրդողանը։

Թուրք առաջնորդը չի հստակեցրել, թե Թուրքիան ինչ քայլերի է պատրաստ, և ինչ պարտավորությունների մասին է խոսքը՝ որպես Հյուսիսատլանտյան դաշինքի անդամ։

«Այժմ մենք ցանկանում ենք լուծում գտնել ներկայիս ճգնաժամից երկխոսության և դիվանագիտության միջոցով: Մենք շարունակում ենք Ռուսաստանին և Ուկրաինային կոչ անել կառուցողական և զսպված պահվածք ունենալ: Բայց Թուրքիան կկատարի ՆԱՏՕ-ին անդամակցելու պահանջները»,- ասել է Էրդողանը:

Նա հավելել է, որ Թուրքիան հենց սկզբից պաշտպանել է Ուկրաինայի տարածքային ամբողջականությունն ու ինքնիշխանությունը։ «Մենք հստակ դիրքորոշում ենք որդեգրել Ուկրաինայի տարածքային ամբողջականությունը խախտելու՝ Ռուսաստանի քայլերի դեմ, հատկապես՝ Ղրիմի անեքսիայի»,- ասել է Էրդողանը։