Բաղդադը հայտարարել է Իրաքից կոալիցիայի մարտական ​​ստորաբաժանումների դուրս բերման ավարտի մասին

Միջազգային հակաահաբեկչական կոալիցիայի մարտական ստորաբաժանումների դուրս բերումն Իրաքից ավարտվել է, երկրում մնացել են միայն օտարերկրյա ռազմական խորհրդատուները. հայտնում է INA գործակալությունը՝ վկայակոչելով Իրաքի զինված ուժերի միացյալ հրամանատարական շտաբի պաշտոնական ներկայացուցիչ Թահսին ալ Խաֆաջին։

«Օտարերկրյա զինված ուժերի առաքելությունը մարտական առաքելությունից վերածվել է խորհրդատվականի... Իրաքում օտարերկրյա զորքերից միայն սահմանափակ թվով խորհրդականներ են մնացել»,- չորեքշաբթի ասել է նա:

2020 թվականի հունվարի 5-ին Իրաքի խորհրդարանը ձայների մեծամասնությամբ քվեարկեց օտարերկրյա զորքերի դուրս բերման օգտին, ինչպես նաև կողմ արտահայտվեց ԱՄՆ-ի գլխավորած հակաահաբեկչական կոալիցիայի հետ համագործակցության ձևաչափի վերանայմանը: Այս միջոցները պատասխան էին Բաղդադի օդանավակայանի տարածքում ԱՄՆ-ի գործողությանը, որի արդյունքում նույն թվականի հունվարի 3-ի գիշերը իրանցի գեներալ, Իսլամական հեղափոխության պահապանների կորպուսի հատուկ նշանակության ջոկատի հրամանատար Ղասեմ Սոլեյմանին և իրաքյան շիա աշխարհազորայինների ղեկավարի տեղակալ Աբու Մահդի ալ Մուհանդիսը սպանվեցին։ Այս իրադարձություններից հետո ԱՄՆ-ի գլխավորած կոալիցիան իրաքյան զինվորականներին է փոխանցել մի շարք օբյեկտներ, որտեղ նախկինում տեղակայվել էին ամերիկյան զինվորականները, այդ թվում՝ մի շարք ավիաբազաներ և կոալիցիայի ռազմական խորհրդատուների շտաբները: