Թուրքիայի արտգործնախարարությունը կանչել է 10 երկրների դեսպաններին՝ Օսման Քավալայի վերաբերյալ հայտարարությունների պատճառով

Թուրքիայի ԱԳՆ-ն Անկարա է կանչել ԱՄՆ-ի, Գերմանիայի, Դանիայի, Ֆինլանդիայի, Ֆրանսիայի, Նիդեռլանդների, Շվեդիայի, Կանադայի, Նորվեգիայի և Նոր Զելանդիայի դեսպաններին` թուրք ակտիվիստ Օսման Քավալայի կալանավորման վերաբերյալ նրանց հայտարարությունների պատճառով: Այդ մասին երեքշաբթի հաղորդել է «Անադոլու» գործակալությունը՝ վկայակոչելով գերատեսչության աղբյուրները:

Ավելի վաղ՝ երկուշաբթի, այս երկրների դեսպանատները հանդես են եկել համատեղ հայտարարությամբ, որում կոչ են արել թուրքական իշխանություններին անհապաղ ազատ արձակել Քավալային:

Սպասվում է, որ երեքշաբթի առավոտյան դիվանագիտական ներկայացուցչությունների ղեկավարները կժամանեն նախարարություն:

Կավալան ձերբակալվել էր 2017 թվականի հոկտեմբերի 18-ին Ստամբուլի օդանավակայանում: Նույն թվականի նոյեմբերի 1-ին դատարանը նրան կալանավորելու որոշում է կայացրել «սահմանադրական կարգը փոխելու և ներկայիս իշխանությունը հեռացնելու փորձի» համար: Թուրքական իշխանությունները նաև համարում էին, որ Քավալան ներգրավված է 2013 թվականին տեղի ունեցած Գեզի պարկում բողոքի ցույցերում:

Նախորդ տարվա փետրվարին Ստամբուլի դատարանը որոշեց արդարացնել և ազատ արձակել ակտիվիստին, սակայն նույն օրն ավելի ուշ դատախազությունը կրկին թույլատրեց նրա կալանքը: