Թուրքիայի ՍԴ-ն մերժել է հայամետ գործիչ Օսման Քավալայի վերաբերյալ դիմումը

Թուրքիայի Սահմանադրական դատարանը մերժել է հայամետ գործիչ Օսման Քավալայի վերաբերյալ դիմումը, որում նշվում էր, որ գործչի ձերբակալությունն անօրինական է, խախտվում են նրա իրավունքները. հաղորդում է gazeteduvar.com.tr կայքը:

Օսման Քավալան ձերբակալվել էր 2017 թ. հոկտեմբերի 19-ին Ստամբուլի օդանավակայանում: Նրան մեղադրում են 2013 թ. Ստամբուլի Գեզի զբոսայգում ցույցերի կազմակերպման մեջ:

Ըստ Քավալայի` իրեն ձերբակալել են այն բանից հետո, երբ նախագահ Էրդողանը Քավալային  անվանել է «Թուրքիայի Սորոս»: Քավալան համարվում է «Amnesty International» կազմակերպության հովանավորներից: Նրան նաև մեղադրում են գյուլենականների հետ կապ ունենալու մեջ:

Քավալան «Անադոլու Քյուլթյուր» կազմակերպության նախագահն է: Աչքի է ընկնում իր հայամետ գործունեությամբ, իրեն պատկանող սրճարանում կազմակերպել է Հայոց ցեղասպանությանը նվիրված միջոցառումներ, նրա տպագրատանը տպվել են Ցեղասպանության վերաբերյալ բազմաթիվ գրքեր: