«Հնարավոր է ավելի արդար աշխարհ». Թուրքիայում սկսվել է Էրդողանի գրքի վաճառքը

Թուրքիայի նախագահ Ռեջեփ Թայիփ Էրդողանի հեղինակած գիրքը սեպտեմբերի 6-ին հայտնվել է թուրքական գրախանութներում․ հայտնում է Hurriyet-ը:

«Հնարավոր է ավելի արդար աշխարհ» (Daha Adil Bir Dünya Mümkün) վերնագրով գրքում Էրդողանը նկարագրում է գլոբալ քաղաքականության առջև ծառացած փակուղիները, այդ թվում՝ անարդարությունը, փախստականների ճգնաժամը, միջազգային ահաբեկչությունը և իսլամաֆոբիան: Նա նաև ՄԱԿ-ի օրինակով բացահայտում է աշխարհում տիրող խտրականությունն ու երկակի ստանդարտները:

Թուրք նախագահը ուշադրություն է հրավիրում ՄԱԿ–ի հետ կապված խնդիրների վրա, ինչպիսիք են թերությունները օրինականության, ներառականության, արդյունավետության, ներկայացուցչության և կառավարման առումով՝ հաստատելով, որ այն կարիք ունի համապարփակ բարեփոխումների:

Որպես լուծում՝ Էրդողանն առաջարկում է արդար ներկայացուցչություն և վետոյի վերացում, որը ներկայումս սահմանափակվում է ՄԱԿ-ի Անվտանգության խորհրդի հինգ մշտական անդամներով` ԱՄՆ-ով, Բրիտանիայով, Ֆրանսիայով, Ռուսաստանով և Չինաստանով (Թուրքիան բազմիցս փորձել էր դառնալ ԱԽ անդամ, սակայն նրան չեն ընդունել):

Գիրքը հրատարակվել է Ստամբուլում գործող Turkuaz հրատարակչության կողմից և թարգմանվել մի քանի լեզուներով՝ արաբերեն, անգլերեն, գերմաներեն, ֆրանսերեն, ռուսերեն և իսպաներեն: