Էրդողանը վստահություն է հայտնել, որ Թուրքիան կգնի Ս-400-ների երկրորդ գունդը

Թուրքիան կասկած չունի, որ Ռուսաստանից գնելու է Ս-400 զենիթահրթիռային համակարգի երկրորդ գունդը. օգոստոսի 29-ին Սարաևոյից վերադառնալիս ինքնաթիռում  լրագրողներին ասել է Թուրքիայի նախագահ Ռեջեփ Թայիփ Էրդողանը:

«Մենք կասկածներ չունենք Ռուսաստանից Ս-400-ի երկրորդ փաթեթը գնելու հարցում: Մենք Ռուսաստանի հետ բազմաթիվ քայլեր ենք ձեռնարկում՝ լինի Ս-400-ը, թե պաշտպանական արդյունաբերության այլ թեմաներ: Մենք օգտագործել ենք ռուսական ինքնաթիռները հրդեհները մարելու համար: Մեր վերջին հեռախոսազրույցում (Պուտինի հետ) քննարկեցինք այս թեման: Երբ ես գնամ Ռուսաստան, կրկին կքննարկենք այս ամենը»,- Էրդողանին մեջբերում է թուրքական NTV-ն:

Օգոստոսի 25-ին «Ռոսօբորոնէքսպորտի» ղեկավար Ալեքսանդր Միխեևը հայտարարեց, որ այս տարի կարող է ստորագրվել Թուրքիային Ս-400 համակարգերի լրացուցիչ խմբաքանակի մատակարարման երկրորդ պայմանագիրը:

Դրանից երկու օր առաջ էլ նա հայտարարել էր, որ Ռուսաստանը և Թուրքիան շարունակում են խորհրդակցությունները Ս-400 զենիթահրթիռային համակարգերի մատակարարման վերաբերյալ, կողմերը բանակցությունների վերջին փուլում են։