Ռուսաստանը Հնդկաստանին Ս-400-ների առաջին գունդը կմատակարարի մինչև տարեվերջ

Հնդկաստանը Ս-400 հակաօդային պաշտպանության համակարգեր, ըստ պայմանագրի, կստանա մինչև տարեվերջ. հայտարարել է ՌԴ ռազմատեխնիկական համագործակցության դաշնային ծառայության փոխտնօրեն Վլադիմիր Դրոժկովը։

«Հնդկաստան Ս-400 զենիթահրթիռային համակարգի առաքումը նախատեսված է ըստ ժամանակացույցի: Ակնկալվում է, որ առաջին գունդը կմատակարարվի այս տարվա վերջին»,- ասել է նա:

Դրոժկովը հիշեցրել է, որ հնդիկ մասնագետները Ռուսաստան էին ժամանել հունվարին և սկսել մարզվել՝ Ս-400-ները գործարկելու համար:

2018-ի հոկտեմբերին Մոսկվան և Նյու Դելին պայմանագիր են ստորագրել ավելի քան 5 միլիարդ դոլար արժողությամբ Ս-400 Triumph զենիթահրթիռային համակարգերի հինգ գնդի մատակարարման մասին, որը «Ռոսօբորոնէքսպորտ»-ի պատմության մեջ ամենախոշոր գործարքն է: Ակնկալվում է, որ առաքումները կավարտվեն մինչև 2023 թվականի ապրիլը: