Գերմանիան գարեջուր կտեղափոխի Աֆղանստանից, որը չեն հասցրել խմել գերմանացի զինվորները

Գերմանիան Աֆղանստանից 22.5 հազար լիտր գարեջուր է դուրս բերելու. գերմանացի զինվորները չեն հասցրել խմել այն: Այս մասին հայտնում է BBC News-ը:

Նման որոշում է կայացվել երկրից զորքերի ընդհանուր դուրսբերման ֆոնին անօրինական զինված խմբավորումների ակտիվացման պատճառով: Բանդաների գործունեության պատճառով գերմանական հրամանատարությունը չոր օրենք է սահմանել, թեև մինչ այդ զինվորները կարող էին օրական խմել երկու տարա գարեջուր կամ այլ ալկոհոլ:

BBC News-ը նշում է, որ գարեջուրը վաճառելու փորձը ձախողվել է. մեծ մասամբ մուսուլման բնակչություն ունեցող երկրում ալկոհոլ օգտագործելն անօրինական է: Արդյունքում՝ գերմանական պահեստներում կուտակվել է գարեջրով ավելի քան 60 հազար տարա, ինչպես նաև հարյուրավոր շիշ գինի: Գերմանիայի ռազմական խոսնակ Քրիստինա Ռուցն ասել է, որ ամբողջ ալկոհոլը դուրս կբերվի Աֆղանստանից և կվերադարձվի Գերմանիա:

ԱՄՆ-ի ու ՆԱՏՕ-ի զորքերի՝ Աֆղանստանից պաշտոնական դուրսբերումը սկսվել է մայիսի 1-ին և կտևի մինչև սեպտեմբերի 11-ը, թեև գործընթացը փաստացի սկսվել էր ապրիլին: