Հյուսիս-հարավի շինարարությունը պետք է շատ արագ Սյունիք տեղափոխվի. Քոչարյան

Armeniasputnik.am-ը գրում է. «ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը Սյունիքում ճանապարհների առումով իր լուծումն է առաջարկում։

«Գիտակցում ենք, որ «Հյուսիս-հարավի» շինարարությունը պետք է շատ արագ Սյունիք տեղափոխվի. հարավն այստեղ է։ Ափսոս, որ կենտրոնից է սկսվել «Հյուսիս-հարավի» շինարարությունը, քանի որ կարծում եմ, որ Սյունիքից պետք է սկսվեր այն»,–ասաց Քոչարյանը։

Նրա խոսքով` անպայման փորձելու են «Հյուսիս-հարավի» ծրագրի մի հատվածը բերել դեպի հարավ` դեպի Մեղրի ու Սյունիք։ Քոչարյանը վստահ է` սա նաև տուրիզմի զարգացման առումով կարող է խթան հանդիսանալ»։ 

Հիշեցնենք, որ Հայաստանում հունիսի 7–ից մեկնարկել է պաշտոնական քարոզարշավը։ Արտահերթ խորհրդարանական ընտրությունները տեղի են ունենալու հունիսի 20–ին։ Դրանց մասնակցելու է 22 կուսակցություն և 4 դաշինք։