Հյուսիս-հարավի շրջանակում Իրանի հետ համագործակցության մեջ մտնելը կթուլացնի ՀՀ-ի նկատմամբ Ադրբեջանի ագրեսիվ նկրտումները. Սաֆրաստյան

ՀՀ վարչապետ Նիկոլ Փաշինյանի՝ Իրան կատարած այցի ընթացքում քննարկվեցին ռազմավարական նշանակության հարցեր՝ և՛ Հայաստանի համար, և՛ տարածաշրջանի: Այս մասին  լրագրողների հետ զրույցում նշեց ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը:

«Այդ խնդիրների քննարկման փաստը վկայում է այն մասին, որ Իրանը բավական լուրջ է տրամադրված` Հայաստանի հետ համագործակցությունը ռազմավարական առումով մեկ աստիճանով բարձրացնելու: Եվ այդ համագործակցությունը դիտարկվում է ոչ միայն երկկողմանի բարեկամական հարաբերությունների, այլև աշխարհաքաղաքական տեսակետից: Երկրորդ՝ քննարկված խնդիրները ծրագրային կոնկրետ մակարդակի հասցնելու համար ժամանակ է պետք և երկու կողմից վճռականություն»,- շեշտեց արևելագետը՝ չբացառելով, որ աշխարհի ուժային կենտրոններից մեկի՝ ԱՄՆ-ի կողմից կլինեն ճնշումներ, ուստի դիվանագիտություն և վճռականություն է հարկավոր:

Այս համատեքստում Սաֆրաստյանը նշեց, որ Իրանը նույնօրինակ խնդիրների շրջանակում համագործակցություն ունի նաև Ադրբեջանի հետ՝ Հյուսիս-հարավ միջանցքի շրջանակներում: 

«Այնպես որ՝ եթե Հայաստանը նույնպես կարողանա մտնել այդ ռազմավարական նշանակություն ունեցող համագործակցության մեջ Իրանի հետ, ապա դա կթուլացնի Ադրբեջանի ագրեսիվ հնարավորությունները, նկրտումները ՀՀ-ի և Արցախի նկատմամբ»,- ընդգծեց Ռուբեն Սաֆրաստյանը: