Իրանում կառուցվող ճանապարհը կկապվի Հյուսիս-հարավի հետ

ԱԺ արտահերթ նիստում քննարկվում է նախագահի ներկայացրած` ՀՀ և Եվրասիական զարգացման բանկի միջև ստորագրված Հյուսիս-հարավ ավտոճանապարհային միջանցքի կառուցման ֆինանսավորման համար Եվրասիական բանկի կողմից վարկի տրամադրման մասին համաձայնագիրը վավերացնելու հարցը:

Հիմնական զեկուցող` տրանսպորտի և կապի նախարարի տեղակալ Արթուր Առաքելյանը նշեց, որ գումարի չափը կազմում է 150 միլիոն դոլար, վարկը վերցվում է առավելագույնը 20 տարով, տոկոսադրույքը՝ 1,65 տոկոս, մայր գումարի մարումը նախատեսվում է իրականացնել առաջին հինգ տարում: Ծրագիրն ընդգրկում է Ագարակից-Քաջարան հատվածի կառուցումը, խորհրդատուի ծառայություններ, աշխատանքների տեխնիկական վերահսկում և ինժեներական ծառայություններ:

Վարկային ծրագրում ներգրավված են տեղական ծառայություններ, տեղական աշխատուժ: Միայն 17 ինժեներներ են, որ եկել են Իսպանիայից:

«Իրանում էլ համանման ծրագիր է իրականացվում, և մեր հարևանները կգան, կմիանան սահմանին մեր կողմից կառուցվող ծրագրին, ինչը հնարավորություն կտա Պարսից ծոցը կապել սևծովյան նավահանգիստների հետ: Հայաստանն էլ կդառնա տարանցիկ երկիր»,- ասաց փոխնախարարը: