Թուրքիան պետք է ընդունի միգրանտներին Հունաստանից. ԵՄ

Եվրամիության հետ 2016 թ. Միգրացիոն համաձայնագրի համաձայն՝ Թուրքիան պետք է վերսկսի այն փախստականների ընդունումը, որոնց ապաստանի հայցերը մերժել է Հունաստանը. ըստ Deutsche Welle-ի` հայտնել է ԵՄ–ի՝ ներքին հարցերով կոմիսար Իլվա Յոհանսոնը հունական Լեսբոս կղզի կատարած այցի ժամանակ։

«Ես հորդորում եմ Թուրքիային` շտապ վերսկսել Հունաստանից միգրանտների ընդունումը»,- ասել է Յոհանսոնը Լեսբոսի ճամբարներ այցելելուց հետո, որտեղ ապրում են ավելի քան 8000 ապաստան հայցողներ:

Հանձնակատարի կոչը հնչել է Եվրահանձնաժողովի նախագահ Ուրսուլա ֆոն դեր Լայենի և Եվրոպական խորհրդի նախագահ Չարլզ Միշելի` Թուրքիա կատարելիք այցի նախօրեին, որը նախատեսված է հաջորդ շաբաթ: ԵՄ պաշտոնյաները բանակցություններ կանցկացնեն թուրք նախագահ Ռեջեփ Թայիփ Էրդողանի և այլ բարձրաստիճան թուրք պաշտոնյաների հետ:

Deutsche Welle-ի տեղեկացմամբ՝ Հունաստանի Լեսբոս, Խիոս, Սամոս, Կոս և Լերոս կղզիների ճամբարներում, ընդհանուր առմամբ, 14000 միգրանտ կա:

Հունաստանի միգրացիայի նախարար Նոտիս Միտարաչին միացել է Յոհանսոնին՝ հորդորելով Թուրքիային` ընդունել 1450 միգրանտների, որոնց ապաստանի հայցերը մերժվել են: