Թուրքիան Ստամբուլի կոնվենցիայի փոխարեն կընդունի «Անկարայի կոնվենցիան»

Թուրքիայի կառավարությունը ձեռնամուխ է եղել Ստամբուլի կոնվենցիան Անկարայի համաձայնագրով փոխարինելու աշխատանքներին։ Այս մասին հայտարարել է իշխող «Արդարություն և զարգացում» կուսակցության փոխնախագահ Ֆաթմա Բեթյուլ Սայան Քայան. հայտնում է Haber-ը։

Պատգամավորը նշել է, որ ստեղծման օրվանից ի վեր ԱԶԿ-ն կանանց դրել է իր քաղաքական կենտրոնում, իսկ կանայք նշանակալի պաշտոններ են զբաղեցրել կուսակցության ղեկավարության մեջ: Նա պարզաբանել է, որ կուսակցության մեջ կանանց մասնաբաժինը աճել է ԱԶԿ-ում՝ հասնելով 17%-ի:

«Երբ Ստամբուլյան կոնվենցիան ստորագրվեց 2011 թ., դա պայմանագիր էր կանանց դեմ բռնության դեմ պայքարելու համար: Բայց վերջին տարիներին մենք տեսնում ենք, որ տարբեր լոբբիստներ սկսել են օգտագործել կոնվենցիան իրենց նպատակների համար»,- ասել է քաղաքական գործիչը:

Նա նշել է, որ «Ստամբուլի կոնվենցիան բևեռացում է առաջացնում հասարակության մեջ»: «Սոցիալական բաժանումը չխորացնելու համար անհրաժեշտություն առաջացավ Ստամբուլի կոնվենցիան փոխարինել մեկ այլ համաձայնագրով, որը պատրաստվում է և դեռևս կոչվում է «Անկարայի համաձայնագիր»,- ավելացրել է Սայան Քայան:

Հիշեցնենք, որ Ստամբուլյան կոնվենցիայից Թուրքիայի դուրս գալու մասին հրամանագիրը ստորագրվել է Թուրքիայի կառավարության թերթում 2021 թվականի մարտի 20-ին: Թուրքիայի իշխանությունները նշել են կոնվենցիայի որոշ դրույթներ, որոնք չափազանց շեշտադրում են ԼԳԲՏ անձանց իրավունքների պաշտպանությունը, ինչը հակասում է թուրքական ավանդական արժեքներին:

Եվրախորհուրդը դատապարտել էր կոնվենցիայից Թուրքիայի դուրս գալը։ Այդ կապակցությամբ ափսոսանք է հայտնել նաև Սպիտակ տունը: