Պակիստանը մեծ նշանակություն է տալիս Ադրբեջանի բանակի հզորացմանը. պակիստանցի բարձրաստիճան գեներալ

Պակիստանում Ադրբեջանի դեսպան Ալի Ալիզադեն հանդիպել է Պակիստանի զինված ուժերի շտաբի պետերի միացյալ կոմիտեի ղեկավար, գեներալ Նադիմ Ռազայի հետ:

Ռազան շեշտել է, որ Պակիստանը շատ ուրախ է վերջին պատերազմում Ադրբեջանի տարած հաղթանակի և «գրավյալ հողերի ազատագրման կապակցությամբ»: Նա նշել է, որ Պակիստանը սատարում է Ադրբեջանի «արդար» դիրքորոշմանը ԼՂ հարցում:

Պակիստանցի գեներալը գոհունակություն է հայտնել երկու երկրների եղբայրական հարաբերությունների զարգացման կապակցությամբ՝ հավելելով, որ Ադրբեջանի զինված ուժերի հետ հարաբերություններում նախկին ռազմավարությունը կշարունակվի փորձի փոխանակման, համատեղ վարժանքների, փոխայցելությունների, ռազմական, կրթական և ռազմատեխնիկական համագործակցության շրջանակներում:

Նադիմ Ռազան շեշտել է, որ Պակիստանի ռազմական գերատեսչությունը մեծ նշանակություն է տալիս ադրբեջանական բանակի հետագա հզորացմանը և կավելացնի ջանքերն այս ուղղությամբ:

Հիշեցնենք, որ ինչպես Արցախյան առաջին պատերազմի, այնպես էլ հետագա ժամանակներում, ՀՀ գոյությունը չճանաչող Պակիստանը ամեն տեսակի օգնություն է ցուցաբերել Ադրբեջանին։