Լինելու ենք այնպիսի ընդդիմություն, որի քայլերը միտված են լինելու Հայաստանի հզորացմանը. Շարմազանով

Էդուարդ Շարմազանովը դեմ է քվեարկել, և առհասարակ` ՀՀԿ-ի հավաքական կարծիքը Փաշինյանի քաղաքական լիդերության, վարչապետության վերաբերյալ չի փոխվել: «Բայց կան իրողություններ, մենք չենք կարող հաշվի չնստել իրողությունների հետ»,-վարչապետի ընտրություններից հետո խորհրդարանում լրագրողներին ասաց ԱԺ փոխնախագահ, ՀՀԿ խոսնակ Էդուարդ Շարմազանովը:

Ըստ նրա` քաղաքական ուժը, որն իրեն համարում է պետական գաղափարախոսության կրող, վերմակն իր վրա գցելով չպիտի առաջնորդվի: «Երբեմն պետք է գնաս զիջումների՝ հասկանալով, որ դա է այդ պահին իրական ճանապարհը»,- հավելեց Շարմազանովը:

Հարցին` մեծամասնությունը ՀՀԿ-ն պահպանելո՞ւ է, նա արձագանքեց. «Ինչ-որ մեկը կասկածո՞ւմ է»: Ապա հավելեց, որ ՀՀԿ-ն ամեն ինչ անում է սկզբունքով, որևէ մեկի ճնշմամբ չի առաջնորդվում, ոչ էլ` սուրճի բաժակ նայելով, հետևաբար` չի կարող ասել, թե ինչպես կքվեարկեն կառավարության ծրագրին: «Երբ կներկայացվի կառավարության ծրագիրը, այդ ժամանակ էլ կասենք»,-ասաց Շարմազանովը:

Հարցին, թե ինչպիսի՞ ընդդիմություն են լինելու, նա պատասխանեց. «Ընդդիմություն, որի քայլերը միտված են լինելու Հայաստանի հզորացմանը»: