Կիպրոսի համար երկու անկախ պետությունների համակեցություն չի կարող լինել. հունաց վարչապետ

Հունաստանի վարչապետ Կիրիակոս Միցոտակիսը և Կիպրոսի Հանրապետության նախագահ Նիկոլաոս Անաստասիադիսը Լևկոսիայում կայացած հանդիպման ժամանակ համատեղ դիրքորոշում են  որդեգրել «Կիպրոսի խնդրի» վերաբերյալ. հայտնում է Greek Military Portal–ը։

Երկու առաջնորդները միասնության կոչ են արել՝ Կիպրոսի մասնատման խնդիրն ընդունելի կերպով լուծելու համար, որն առաջացել է 1974-ի թուրքական ներխուժումից հետո, ինչը հանգեցրել է հազարավոր զոհերի, զանգվածային բռնաբարությունների և ավելի քան 200,000 փախստականների:

«Այսօրվա այցը նուրբ ժամանակ է Կիպրոսի խնդրի համար»,- ասել է Հունաստանի վարչապետը`նշելով, որ այս հարցը քննարկվում է ՄԱԿ-ի հովանու ներքո անցկացվող հնգակողմ հանդիպման շրջանակներում:

«Ես հավաստիացրել եմ, որ թուրքական օկուպացիային վերջ տալը և ֆունկցիոնալ ու փոխընդունելի լուծում գտնելը շարունակում է մնալ Հունաստանի արտաքին քաղաքականության հիմնական ազգային գերակայությունը»,- ասել է Միցոտակիսը:

Նա արտահայտել է երկու կողմերի հավատարմությունը ՄԱԿ-ի որոշումներին, որոնք սահմանում են Կիպրոսի խնդրի լուծման «միակ համընդհանուր պարտադիր հիմքը»:

«Ցավոք, - հավելել է Միցոտակիսը, - Թուրքիան և Կիպրոսի թուրք նոր ղեկավարը գտնվում են ՄԱԿ-ի սահմաններից դուրս՝ պնդելով երկու պետությունների անհիմն դիրքորոշումը, որը մերժվում է ոչ միայն Հունաստանի և Կիպրոսի, այլ նաև ՄԱԿ-ի և ԵՄ-ի կողմից»։

«Անկարան և Թաթարը (Կիպրոսի թուրքական մասի նոր ղեկավարը) պետք է իմանան, որ երկխոսության վերսկսումը տեղի կունենա միայն այն շրջանակներում, որը ես ընդգծել եմ»,- ասել է նա՝ ավելացնելով, որ «հարցի լուծումը չպետք է ծառայի Թուրքիայի նպատակներին»:

Միցոտակիսը կոչ է արել Թուրքիային՝ գործնականում ապացուցել, որ իսկապես ցանկանում է անկեղծ երկխոսություն, ինչպես նաև դադարեցնել անօրինական գործողություններն ու սադրանքները: