Գործընթացի քաղաքական ենթատեքստն ակնհայտ է. Սեյրան Օհանյան

Հայաստանի պաշտպանության նախկին նախարար Սեյրան Օհանյանն արձանագրում է, որ սահմանադրական կարգի ենթադրյալ տապալման գործով դատավարության քաղաքական ենթատեքստն ակնհայտ է: Այս մասին նա հայտարարեց այսօր ընթացող դատական նիստում՝ արտահայտելով իր տեսակետը դատավոր Աննա Դանիբեկյանի ինքնաբացարկի միջնորդության վերաբերյալ:

Հիշեցնենք, որ դատավորը թույլ չտվեց նախկին փոխվարչապետ Արմեն Գեւորգյանին, որի փաստաբանը ներկայացրել էր միջնորդությունւ, քաղաքական գնահատականներով հանդես գալ:

«Ակնհայտ է, որ կողմնակալ վերաբերմունք կա: Մենք կարծում ենք, որ քաղաքական հետապնդումն ակներեւ է: Որպես պաշտպանվող կողմ` մենք ասում ենք, որ սա քաղաքական հետապնդման արդյունք է: Իսկ ո՞վ ասաց, որ մենք չենք կարող դրա մասին ասել: Ինքնաբացարկի վերաբերյալ տեսակետի ներկայացումը կարող է նաեւ քաղաքական բաղադրիչ պարունակել: Չէ՞ որ նա պետք է հիմնավորումներ ներկայացնի: Բացի այդ՝ դատավորի կողմից սահմանված ժամկետները սահմանափակում են արտահայտվելու հնարավորությունը: Եվ դա քաղաքական հետապնդման արդյունք է: Եթե Գեւորգյանն արտահայտվեր, որոշ մարդիկ երեւի կհարցնեին Ձեզ, թե ինչու դա թույլ տվեցիք: Եվ Ձեր գործողությունները քաղաքական հետապնդման շարունակություն են: Մարդկային տեսանկյունից դա սխալ մոտեցում է»,- ասաց Օհանյանը դատավորին: