Ռուսները չեն ցանկանում, որ մենք լինենք հայկական բնակավայրերում, մենք դա կքննարկենք Բաքվի հետ և որոշում կկայացնենք. Թուրքիայի ՊՆ

Ղարաբաղում հրադադարը հիմնականում հարգվում է. ասել է Թուրքիայի ազգային պաշտպանության նախարար Հուլուսի Աքարը:

«Հրադադարը հիմնականում հարգվում է: Ռուսները նույնպես ուշադիր են այս հարցում: Մենք հետևում ենք իրադարձությունների զարգացմանը», - ըստ Hürriyet-ի` ասել է Աքարը թուրքական լրատվամիջոցներին տված հարցազրույցում:

Նախարարը նաև հայտնել է, որ ներկայումս ընթանում է հրադադարի ռեժիմի պահպանումը դիտարկող ռուս-թուրքական կենտրոնի կառուցումը, որը տեղակայվելու է Աղդամում (Ակնա):

«Մեր գեներալը, որը գլխավորում է դա, և այլ անձնակազմը արդեն պատրաստ են: Մենք մեր սակրավորներին էլ ենք ուղարկել այնտեղ: Նրանք վարժանքներ են անցկացնում, հետո սկանավորում տարածքը: Երկու հատուկ խումբ կա, որոնք ականներ են որոնելու», - ասել է նախարարը:

Ինչ վերաբերում է Ղարաբաղում թուրք զինվորականների ներկայությանը, Աքարը նշել է, որ այդ հարցը կքննարկվի Ադրբեջանի ու Թուրքիայի միջև:

«Հայերն ապրում են Ղարաբաղի մի հատվածում: Խաղաղությունը պահպանելու համար այնտեղ տեղակայված են ռուս զինվորականներ: Թուրք զինվորների առկայությունը Թուրքիայի և Ադրբեջանի հարցն է: Ռուսական կողմը կարծում է, որ հայերի բնակավայրերում չպետք է լինեն թուրք զինվորականներ, քանի որ դա կարող է խնդիրներ ստեղծել: Մենք դա կքննարկենք Բաքվի հետ և որոշում կկայացնենք»,- ասել է Աքարը:

Նա նաև նշել է, որ, զուգահեռաբար, աշխատանքներ են տարվում Նախիջևանի և Լաչինի տրանսպորտային միջանցքների ուղղությամբ: