Եթե հասարակական պահանջ լինի, գազային պայմանագրերը կքննարկենք. Գալուստ Սահակյան

Եթե հասարակական պահանջ լինի, և մարդիկ մեկնաբանությունների կարիք ունենան, մենք կանդրադառնանք գազային համաձայնագրերի ուսումնասիրման հարցին՝ լսումների կամ քննարկումների միջոցով, սակայն դեռ դրա կարիքը չկա: Այս մասին ԱԺ ճեպազրույցների ժամանակ ասաց ՀՀԿ խմբակցության ղեկավար Գալուստ Սահակյանը՝ պատասխանելով այն հարցին՝ արդյո՞ք քաղաքական մեծամասնությունը որևէ բան կնախաձեռնի գազային համաձայնագրերի ուսումնասիրման համար:

Գալուստ Սահակյանը նշեց, որ քաղաքական մեծամասնությունը նոր սցենարով կստեղծի հանձնաժողով, որը պարբերաբար բաց նիստեր կանի, սակայն դա կլինի այն ժամանակ, եթե դրա հասարակական պահանջը լինի: «Հենց այնպես հանձնաժողովներ չեն ստեղծվում, մանավանդ` գիտենք, որ այս տարիների ընթացքում ժամանակավոր հանձնաժողովների ստեղծումը միշտ շահարկումների թեմա է եղել»,- ասաց նա: