Իրաքը ահաբեկչության մեղադրանքով մահապատժի է ենթարկել 21 մարդու

Իրաքի իշխանությունները մահապատժի են ենթարկել 21 բանտարկյալի, որոնք պատիժ էին կրում Դի Քար նահանգի Նասիրիյա բանտում: Այս մասին նոյեմբերի 16-ին հայտնել է Reuters գործակալությունը:

Մահապատժի ենթարկված անձանց կամ նրանց կողմից կատարված հանցագործությունների մասին մանրամասներ հայտնի չեն: Բոլորը դատապարտվել են ահաբեկչությանն առնչվող հոդվածներով: Ըստ գործակալության՝ մահապատժի ենթարկվածների թվում եղել է երկու տղամարդ, որոնք մասնակցել են Թալ Աֆար քաղաքում տեղի ունեցած ահաբեկչություններին:

Գործակալությունը նշում է, որ «Իսլամական պետություն» ահաբեկչական խմբավորման ջախջախումից հետո Իրաքի իշխանությունները հարյուրավոր կասկածյալ ջիհադիստների պատասխանատվության են ենթարկել և իրականացրել ենթադրյալ զինյալների մի քանի զանգվածային մահապատիժներ:

Իրավապաշտպան խմբերը կարծում են, որ երկրում ահաբեկչության վերաբերյալ որոշ դատավարություններ թերի են, ինչը հանգեցնում է անարդար դատավճիռների: Իրաքի իշխանություններն, իրենց հերթին, արդար են համարում երկրի դատարանները:

2018-ին Իրաքի վարչապետ Հայդեր ալ Աբադին հրամայել էր «անհապաղ» ի կատար ածել ահաբեկչության համար մահապատժի դատապարտված բոլոր ջիհադականների դատավճիռը. նա արձագանքել է զինյալների կողմից գերեվարված ութ մարդու մահապատժին: