ԱՄՆ-ում ձերբակալված կաշառակեր ադրբեջանցու գործընկերը նույն մեղադրանքով մահապատժի է ենթարկվել

Տեղեկացրեցինք, որ Թուրքիայում «մեծ կաշառք» գործողության շրջանակներում ձերբակալված, այնուհետև ազատ արձակված` իրանական ծագումով ադրբեջանցի գործարար Ռեզա Զարրաբը ձերբակալվել է ԱՄՆ-ում:

Թուրքական կայքերում դա մեծ արձագանքի է արժանացել: T24-ը Զարրաբի նախկին ձերբակալության, ինչպես նաև նրա դեմ ներկայացված մեղադրանքների մասին նոր մանրամասներ է հրապարակել: Պարզվում է` Զարրաբի գործընկեր Բեբեք Զենջանին, ով մեղադրվել է Իրանում միլիոնավոր դոլարանոց կաշառակերության մեջ, դատապարտվել է մահապատժի: Մինչդեռ Զարրաբը հերքել է Զենջանիի՝ իր գործընկերը լինելու մասին տեղեկությունները:

«Նա երբեք իմ գործընկերը չի եղել, և ես Իրանի փողով առևտուր չեմ արել: Ես Թուրքիայի Հանրապետության քաղաքացի եմ և շարունակում եմ ապրել ու աշխատել որպես իմ երկրին օգտակար քաղաքացի»,- նախկինում արած հայտարարության մեջ նշել է ադրբեջանցի գործարարը: