Իրանի ԱԳ փոխնախարարը մեկնել է Բաքու՝ իրենց նախաձեռնած խաղաղության ծրագիրը ներկայացնելու

Իրանի արտաքին գործերի փոխնախարար Աբաս Արաղչին Բաքու է մեկնել որպես հատուկ բանագնաց՝ Իրանի նախաձեռնած՝ ԼՂ հակամարտության կարգավորման գործընթացն առաջ մղելու: Ըստ ԻՌՆԱ գործակալության՝ այցի ընթացքում նախատեսված են քննարկումներ Ադրբեջանի պաշտոնյաների հետ: 

Արաղչին հայտնել է, որ կլինեն այցելություններ նաև տարածաշրջանի այն երկրներ, որոնք կարող են նպաստել երկու երկրների միջև հակամարտության հանգուցալուծմանը: Այցելությունների ժամանակ կներկայացվեն երկարատև խաղաղության հաստատման՝ Իրանի Իսլամական Հանրապետության նախաձեռնության մանրամասները:

Իրանի արտգործնախարար Մոհամադ Ջավադ Զարիֆը հոկտեմբերի 27-ին ԻԻՀ խորհրդարանի ազգային անվտանգության և արտաքին քաղաքականության հանձնաժողովում, մասնակցելով Լեռնային Ղարաբաղի շուրջ զարգացումներին նվիրված քննարկմանը, հայտարարել էր, որ Իրանը ԼՂ հակամարտության մշտական կարգավորման համար նախագիծ է մշակել, որը պետք է ներկայացնեն Բաքվում, Երևանում, Մոսկվայում։ Զարիֆը հավելել է, որ իրենց անհանգստացնում է տարածաշրջանում թաքֆիրի ահաբեկիչների ներկայությունը: