Այսօրվանից կմեկնարկի դեպի օկուպացված տարածքներ՝ Բաքու-Շուշի, Բաքու-Ակնա երթուղին

Հունվարի 24-ից Բաքու-Շուշի-Բաքու առաջին ավտոբուսային կանոնավոր երթուղու համար վաճառվել է շուրջ 400 տոմս։ Այս ուղղության բոլոր տոմսերը սպառվել են մինչև փետրվարի 15-ը. երկուշաբթի հաղորդում են ադրբեջանական լրատվամիջոցները։

Բաքվից Շուշի ճանապարհը 6 ժամ 30 րոպե է, Աղդամ՝ 6 ժամ։ Զբոսաշրջիկներին երկու ժամ է տրվում երկու քաղաքներն այցելելու համար։

«Դեպի օկուպացիայից ազատագրված՝ Ադրբեջանի տարածքներ առաջին ավտոբուսային երթուղիների գործարկումը կարևոր դեր կխաղա այդ շրջանների սոցիալական, տնտեսական և հումանիտար ինտեգրման գործում»,- ասել է ադրբեջանական նախարարությանը կից ճանապարհային տրանսպորտի պետական ծառայության ղեկավար Անար Ռզաևը։ 

Դեպի Արցախի օկուպացված շրջաններ բոլոր երթուղիները կիրականացվեն ոստիկանության աշխատակիցների ուղեկցությամբ։ Վերջին կանգառում՝ 44-օրյա պատերազմի արդյունքում ադրբեջանական վերահսկողության տակ անցած տարածքներ մտնելուց առաջ, ուղևորները կրկին կստուգվեն, ավտոբուս կբարձրանա ոստիկան։ Ուղևորությունը տեղի կունենա անվտանգության աշխատակիցների մասնակցությամբ։