Ադրբեջանն իր աջակցությունն է հայտնել «եղբայրական» Թուրքիային՝ պաշտպանելով նրա բոլոր ապօրինի քայլերը Միջերկրականում

Ադրբեջանական կողմը վճռականորեն պաշտպանում է եղբայրական Թուրքիայի քայլերը, որոնք պատմականորեն կարևոր դեր են խաղացել Միջերկրական ծովի տարածաշրջանի զարգացման գործում՝ հիմնված միջազգային իրավունքի վրա, որն ուղղված է տարածաշրջանում խաղաղության և կայունության ապահովմանը, և հույս է հայտնում, որ շուտով կլուծվի առկա լարվածությունը: Այս մասին հայտարարել է Ադրբեջանի Արտաքին գործերի նախարարության մամուլի ծառայության ղեկավար Լեյլա Աբդուլլաևան՝ պատասխանելով Արևելյան Միջերկրական ծովում Թուրքիայի գործունեության և այդ կապակցությամբ ՀՀ ԱԳՆ հայտարարության վերաբերյալ:

Ըստ Աբդուլաևայի՝ «երրորդ կողմերի փորձերը՝ իրավիճակն օգտագործել տարածաշրջանի երկրների նկատմամբ իրենց թշնամական և կողմնակալ մոտեցման համար, պետք է վճռականորեն մերժվեն»: «Թուրքիայի դեմ անհիմն մեղադրանքներ պարունակող հայկական կողմի դիրքորոշումն ու հայտարարությունները պետք է դատապարտվեն և ճնշվեն՝ որպես իրենց նեղ քաղաքական շահերը չարաշահելու փորձ՝ հաշվի առնելով Միջերկրական ծովի ավազանում նկատվող լարված իրավիճակը», - ասել է այդ երկրի ԱԳՆ մամուլի ծառայության ղեկավարը:

Աբդուլաևան հավանաբար «մոռացել» է մեկ ամիս առաջ՝ հուլիս ամսին Տավուշյան դեպքերի ընթացքում երրորդ երկիր հանդիսացող Թուրքիայի՝ ամենաբարձր մակարդակով հայտարարությունները, որտեղ Հայաստանին մեղադրում էին «պատերազմ սանձազերծելու» և «օկուպացիոն քաղաքականություն» իրականացնելու մեջ։