Պուտինի նկատմամբ վստահության մասին փաստող հանրաքվե է կայացել. Պեսկով

Կրեմլում գոհ են սահմանադրական փոփոխությունների հանրաքվեի արդյունքներից և դրանք համարում են հաղթական. այս մասին գրում է РБК-ն՝ լրագրողների հետ զրույցում ՌԴ նախագահի մամլո քարտուղար Դմիտրի Պեսկովի խոսքերին հղումով:

Նա, մասնավորապես, նշել է. «Ըստ էության, դե ֆակտո նախագահ Պուտինի նկատմամբ վստահության մասին փաստող հաղթական հանրաքվե է կայացել»։ 

Կրեմլում ակնկալում էին ՌԴ քաղաքացիների բարձր հետաքրքրվածությանը սահմանադրական փոփոխությունների վերաբերյալ: «Դա պայմանավորված է եղել փոփոխությունների ձևավորման գործընթացքում հասարակական ակտիվությամբ»,- նշել է նախագահի խոսնակն ու հավելել՝ «նման բարձր մասնակցության հայտ և աջակցության բարձրագույն մակարդակ» կանխատեսելը բարդ էր:

Հիշեցնենք, ըստ ՌԴ Կենտրոնական ընտրական հանձնաժողովի տվյալների, քվեաթերթիկների 100 տոկոսի դիտարկումից հետո երկրի Հիմնական օրենքում փոփոխություններ անելուն կողմ է քվեարկել քաղաքացիների 77.92 տոկոսը, դեմ՝ 21.27 տոկոսը: Մասնակցության հայտը կազմել է 67.97 տոկոս: