Զելենսկին հայտնել է ԱՄՆ-ի նկատմամբ Ուկրաինայի վստահության խաթարման մասին և պահանջել երկիրն անհապաղ ընդգրկել ՆԱՏՕ-ի մեջ

Ուկրաինայի նախագահ Վլադիմիր Զելենսկին հայտարարել է, որ ԱՄՆ-ի վերջին քայլերը թուլացնում են ուկրաինացիների վստահությունը Վաշինգտոնի «անսասան աջակցության» նկատմամբ: Այս մասին նա ասել է Axios-ին տված հարցազրույցում:

«Բոլոր գործողությունները, որոնք մենք քննարկել ենք ձեզ հետ, թուլացնում են Ուկրաինայի ներքին վստահությունը անսասան աջակցության հարցում (ԱՄՆ-ի)»,- ասել է Զելենսկին:

Նույն հարցազրույցում Ուկրաինայի ղեկավարը խոստովանել է, որ ինքը և Ուկրաինայի այլ մարդիկ «շատ տհաճորեն զարմացել են» ԱՄՆ-ի՝ «Հյուսիսային հոսք-2»-ի դեմ պատժամիջոցներից հրաժարվելուց:

Զելենսկին ասել է, որ Ուկրաինան պետք է անհապաղ ընդունվի ՆԱՏՕ: «Եթե մեզ ողջունում են ՆԱՏՕ-ում, եթե նրանք իսկապես ուզում են մեզ տեսնել իրենց անդամների շարքում, ապա իմաստ չունի հեռադիտակով ինչ-որ հեռավոր ապագա փնտրել և քննարկել ապագան»,- ասել է նա:

Զելենսկիի խոսքով՝ Ուկրաինայի՝ Հյուսիսատլանտյան դաշինքում ընդգրկվելու հարցը պետք է «անհապաղ լուծել»: «Հիմա մենք վտանգի տակ ենք, հիմա վտանգվում է մեր անկախությունը, և հենց հիմա մեզ օգնելու կարիք կա», - ասել է նա:

Ուկրաինայի նախագահը նաև համոզմունք է հայտնել, որ իր երկիրն, ի վերջո, կմտնի ՆԱՏՕ, սակայն կարծում է, որ Ուկրաինայի քաղաքացիները դրան ավելի ու ավելի քիչ են հավատում: Քաղաքական գործիչն այս իրավիճակը համարել է մեծ խնդիր: