Իրանի քաղաքացուն դատապարտել են մահվան ԿՀՎ-ին Սոլեյմանիի մասին տեղեկություններ հաղորդելու համար

Իրանի քաղաքացին դատապարտվել է մահապատժի հօգուտ ԱՄՆ ԿՀՎ-ի լրտեսություն իրականացնելու համար. տեղեկացնում է yerkir.am-ը`Reuters-ին հղումով:

Իրանի դատական մարմինների հաղորդմամբ` դատապարտյալը տեղեկություններ է հաղորդել  Իսլամական հեղափոխության պահապանների կորպուսի «Ալ Քուդս» հատուկ ստորաբաժանման հրամանատար, գեներալ Ղասեմ Սոլեյմանիի գտնվելու վայրի մասին:

Այս տարվա հունվարին ԱՄՆ-ը հատուկ գործողություն էր իրականացրել Իրաքում, որի արդյունքում գեներալ Սոլեյմանին սպանվել էր: Ի պատասխան` Իրանը հարվածներ էր հասցրել Իրաքի արևմուտքում տեղակայված ամերիկյան ավիաբազային, նաև` Իրաքյան Քուրդիստանում գտնվող ամերիկյան ռազմական օբյեկտի: Արդյունքում տուժել էր ավելի քան 100 ամերիկյան զինծառայող: