Սահմանափակումները լուրջ զրկանքներ են առաջացնում, սակայն նժարին դրված է կյանքն ու առողջությունը․ Արմեն Խաչատրյան

«Եթե քաղաքացիները կորոնովիորուսի համաճարակը կանխելու  համար սահմանված կանոնները չպահպանեն, ապա, ինչպիսի հարկադրանք էլ մենք փորձենք կիրառել, ինչպիսի քարոզչական աշխատանքներ էլ որ տանենք, պետության համար շատ դժվար կլինի»,- Yerkir.am-ի հետ զրույցում ասաց ԱԺ «Իմ քայլը» խմբակցության պատգամավոր Արմեն Խաչատրյանը՝ անդրադառնալով արտակարգ դրությունով պայմանավորված սահմանափակումներին։

Պատգամավորի խոսքով՝  քաղաքացիներից, նրանց իրավագիտակցությունից  այսօր շատ բան է կախված, եթե քաղաքացիները մտահոգություններ, կանոնները պահպանելու անձնական շահագրգռվածություն չունենան, ապա շատ բարդ կլինի։

Դիտարկմանը, որ սահմանափակումները մեղմվել են, սակայն փակ և բաց տարածքներում դիմակ կրելու պարտադիր պահանջ կա, որին չենթարկվելու համար բարձր տուգանք է սահմանված, իսկ օրական մի քանի դիմակ գնելը  զգալի գումար է կազմում  և ուղղակիորեն  հարվածում է քաղաքացու գրպանին, Խաչատրյանը պատասխանեց. «Լավ օրից չէ, որ այսօր հարկադրանքի այդպիսի միջոցներ են սահմանվել։ Այո, այսօր կան զրկանքներ և լուրջ զրկանքներ, բայց բոլորս պետք է տանենք հանուն մեր և շրջապատի կյանքի։ Նժարին դրված է մարդու առողջությունն ու կյանքը և մյուս կողմից՝ այդ կանոնների պահպանումը, որը որոշակի զրկանքներ է ենթադրում, սակայն  դա անհամատեղելի է նժարի մյուս կողմում դրվածի՝ մեր կյանքի և առողջության հետ։ Հետևաբար՝ այս կանոնները պետք է պահպանել։ Որքան էլ ցանկացած սահմանափակում զրկանքներ առաջացնի,  պետք է հասկանալ, որ այլ տարբերակ ուղղակի չկա»։

Հարցին, որ տեսակետ կա, որ արտակարգ դրության երկարացումն առավելապես քաղաքական նպատակ ուներ՝ այն է, լուծումներ գտնել առանց հանրաքվեի ՍԴ-ի շուրջ ստեղծված իրավիճակը հանգուցալուծելու համար, քանի որ իշխանությունը վախենում է պարտվել հանրաքվեում, պատգամավորը պատասխանեց․

«Արտակարգ դրությունը բավականին դժվարացրեց իրավիճակը, քարոզարշավն արդեն սկսվել էր և մեծ թափով ընթանում էր, հիմա վաղուց ավարտել էինք այդ հանրաքվեն։ Սակայն կորոնավիրուսի պայմաններում դատաիրավական համակարգում իրականացվելիք բարեփոխումները կասեցվեցին, և քանի որ հասկանալի չէ, թե այս իրավիճակը որքան կտևի, պետք է համատեղել վիրուսի կանխարգելման հետ կապված միջոցառումները և բարեփումների գործընթացը: Չի՛ կարելի թողնել, որ բարեփոխումները կանգ առնեն կամ չշարունակվեն»։

Մանրամասները՝ տեսանյութում.