Հերթական անգամ գործ ունենք անգրագետ ու թափթփված ձևակերպման հետ. Բ. Եսայանը՝ պարետի որոշման մասին

ՀՅԴ անդամ, ԿԳ նախկին փոխնախարար Բագրատ Եսայանն իր ֆեյսբուքյան էջում գրում է.

«Կարդում եմ ՀՀ պարետի 14 մայիսի N74 որոշման 5-րդ և 9-րդ կետերը.

« 5. Սահմանել, որ հանրային բաց տարածքներում դիմակի առկայությունը պարտադիր է։
…
9. ՀՀ ոստիկանության պետ Արման Սարգսյանին՝ ապահովել սույն որոշման 5-րդ կետով սահմանված կարգավորման նկատմամբ մշտադիտարկումը եւ վերահսկողությունը:»

Հիմա բանասերները, իրավաբանները կարո՞ղ են ինձ ասել, քաղաքացիների համար 5-րդ կետով պարտավորություն սահմանվե՞լ է, թե՞ ոչ։ Դիմա՞կն է պարտավոր առկա լինել բաց տարածքում, ոստիկանությունը ո՞նց պետք է ստուգի, բաց տարածքում դիմակ առկա՞ է, թե՞ ոչ։ Քաղաքացին էս ամեն ինչի հետ ի՞նչ կապ ունի։ Եթե բաց տարածքում դիմակն առկա չէ, ո՞վ է դրա մեղավորը, ու՞մ են տուգանելու, դիմակի՞ն, տարածքի՞ն, թե՞ քաղաքացուն։ Եթե քաղաքացուն, նա ի՞նչ պարտավորություն ունի, ո՞ր կետով է այդ պարտավորությունը սահմանված, ո՞ր քաղաքացին է պարտավոր ապահովել դիմակի առկայությունը։ Ի վերջո, ի՞նչ դիմակի մասին է խոսքը։
Երևի հասկանալի է, որ հերթական անգամ գործ ունենք անգրագետ ու թափթփված ձևակերպման հետ, որը ոչ մի կապ չունի իրավական ակտի որոշակիության սկզբունքի հետ։

Եվ հարցը՝ ի վերջո սրանք մի բան կարո՞ղ են նորմալ անել»։