Թափթփված, անշնորհք կառավարության վատ աշխատանքի արդյունքը

ԱԺ ավանդական ճեպազրույցում «Ժառանգություն» խմբակցության ղեկավար Զարուհի Փոստանջյանը ասաց, որ թեեւ երեկ ավարտվեց հերթական նստաշրջանը, հնչեց ՀՀ օրհներգը, բայց եկող շաբաթ արտահերթ նիստ է հրավիրվում: Ըստ պատգամավորի` դա պայմանավորված է նրանով, որ այս կառավարությունը համապատասխան ժամանակացույցով չի հասցնում ավարտել իր աշխատանքը:

«Թափթփված, անշնորք կառավարության վատ աշխատանքի պատճառով նորից ուզում են ծանրաբեռնել Ազգային ժողովի աշխատանքները, որ փորձեն շտկել իրենց աշխատանքները: Այս տարին ավարտում ենք հսկայական հարկային բեռով, քաղաքացիների եկամուտները փաստացի նվազում են ունենալու, առաջին անհրաժեշտության ապրանքների գներն են թանկացել, այդ առումով` անբավարար եմ գնահատում թե' կառավարության, թե' Ազգային ժողովի աշխատանքները»,- նշեց Փոստանջյանը:

Լրագրողներից մեկը հետաքրքրվեց, թե ինչո՞ւ խորհրդարանական ընդդիմությունը անվստահություն չի հայտնում քաղաքական մեծամասնությանը ու չի լքում Ազգային ժողովի նիստերը: «Շատ հաճախ մեզ փորձում են լռեցնել, կամայական անջատում են խոսափողը: Այո, մենք պետք է դիմենք ռադիկալ միջոցների: Մենք դիմելու ենք Սահմանադրական դատարան` կուտակային կենսաթոշակային համակարգի հետ կապված: Դա, իհարկե, գործիք է, բայց միայն համազգային գործադուլի և այլ համատեղ ջանքերի միջոցով կարող ենք հասնել հաջողությունների»,- ասաց պատգամավորը:

Լրագրողների դիտարկմանը, որ թեեւ ինքն առաջարկում է համազգային գործադուլ, բայց «Ժառանգություն» խմբակցության պատգամավոր Թևան Պողոսյանը դեմ էր դրան, ինչպե՞ս կարելի է դա հասկանալ, Փոստանջյանը պատասխանեց, որ Թևան Պողոսյանը «Ժառանգություն» կուսակցության անդամ չէ, նա կարող է ազատորեն արտահայտել իր կարծիքը, «բայց համազգային գործադուլի պահանջը կա, և այն պետք է իրականացնել»:

Հարցին ի պատասխան, թե հնարավո՞ր է, որ Րաֆֆի Հովհաննիսյանը հրաժարվի կուսակցության առաջնորդ լինելուց, Փոստանջյանը վստահեցրեց` ոչ, նման բան հնարավոր չէ: