Ուհանում բնակիչների շրջանում զանգվածային թեստավորումը կլինի անվճար

Չինաստանի Ուհան քաղաքում, որը համարվում է կորոնավիրուսի «ծննդավայրը», բնակիչների զանգվածային թեստավորումը լինելու է անվճար. այս մասին գրում է ՌԻԱ «Նովոստի»-ն՝ առողջապահական հարցերով քաղաքային կոմիտեի հայտարարությանը հղումով:

Նշվում է՝ ըստ Ուհանի օպերատիվ շտաբի որոշման, քաղաքում 10 օրվա ընթացքում պետք է թեստավորվեն բոլոր բնակիչները: Դա արվեց այն բանից հետո, երբ քաղաքում դադարից հետո կրկին վարակի նոր դեպքեր ի հայտ եկան: Ուհանում զանգվածային թեստավորումը սկսվել է մայիսի 14-ին:

Հաղորդագրությունում, մասնավորապես, ասվում է. «Ուհանի բնակիչները ստիպված չեն լինելու վճարել թեստավորման համար, ծախսերը հոգում են քաղաքային իշխանությունները»։

Նշվում է, որ հասարակության շրջանում նման համատարած թեստավորման անցնելու պատճառներից էր նաև այն, որ քաղաքում ի հայտ են գալիս առանց ախտանշանների վարակվածության դեպքեր, ինչը բացասական է ազդում մարդկանց բնականոն կյանքի վրա՝ առաջացնելով վախեր: