Կորոնավիրուսը նահանջում է. Ուհանում հիվանդանոց է փակվել՝ բավարար վիրուսակիր չլինելու պատճառով

Չինական Ուհան քաղաքի իշխանությունները փակել են ժամանակավոր հիվանդանոցը՝  նոր անհայտ տեսակի կորոնավիրուսով հիվանդացությունների քանակի կրճատման պատճառով. հայտնում է Yerkir.am-ը՝ Reuters-ին հղումով:

Գործակալության տվյալներով՝ փակված հիվանդանոցն այն 16 բուժհաստատություններից մեկն էր, որը հատուկ կառուցվել էր կորոնավիրուսային համաճարակի դեմ պայքարի նպատակով: Հիվանդանոցը փակվել է այն բանից հետո, երբ վերջին հիվանդները դուրս են գրվել այնտեղից:

Հավելվում է նաև, որ օրերս Հուբեյում և դրա մայրաքաղաք Ուհանում ևս կորոնավիրուսով վարակման դեպքերի կտրուկ կրճատում է նկատվել: Այսպես՝ մարտի 1-ին, հունվարից ի վեր առաջին անգամ, այնտեղ գրանցվել են վարակի 200-ից պակաս դեպքեր, իսկ մինչ այդ  օրական գրանցվում էր 570 նոր դեպք:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին: