Ադրբեջանում կորոնավիրուսակիրների թիվը հասել է 11-ի

Ադրբեջանում մարտի 9-ին երեկոյան հայտնաբերվել է կորոնավիրուսով վարակման 2 նոր դեպքը. հայտնում է Yerkir.am-ը՝ Turan-ին հղումով:

Նշվում է՝ վարակակիրները 1966 և 1978 թվականներին ծնված Ադրբեջանի քաղաքացիներ են, որոնք վերադարձել են Իրանից:

Հիվանդները գտնվում են հիվանդանոցում և պահվում են հատուկ ռեժիմի տակ: Նրանց վիճակը այս պահին գնահատվում է կայուն:

Ի վերջո՝ Ադրբեջանում կորոնավիրուսով վարակվածների թիվը հասել է 11-ի: Վարակվածներից մեկի՝ 1938 թվականին ծնված քաղաքացու վիճակը շարունակում է մնալ կայուն ծանր:

Հիշեցնենք՝  դեռևս մարտի 6-ին հաղորդվել էր այն մասին, որ Ադրբեջանում կարանտինի մեջ է գտնվում մոտ 500 մարդ: 

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 10-ի ժամը 09.33-ի դրությամբ ողջ աշխարհում հաստատվել է կորոնավիրուսով վարակման 114.448 դեպք, որից 4026-ը՝ մահվան, և 64.156-ը՝ առողջացման:

Հիշեցնենք՝ Եվրոպայում ավելի քան 9000 հայտաբերված վարակակիր կա, որից 2/3-ը բաժին է ընկնում Իտալիային, վարակման ավելի քան 700-ական դեպքեր են գրանցվել Ֆրանսիայում և Գերմանիայում։ Առաջին անգամ կորոնավիրուս է հայտնաբերվել նաև Մոլդովայում։

Հայաստանում այս պահին կորոնավիրուսի հաստատված 1 դեպք կա: Տղամարդը Երևան էր ժամանել Թեհրանից: Այս պահին նա և օդանավում եղած մնացյալ 30 անձինք գտնվում են կարանտինում՝ Ծաղկաձորի «Գոլդեն Փելիս» հյուրանոցային համալիրում: Նրանք իրենց լավ են զգում: