Իրանագետը՝ Նիկոլ Փաշինյանի օգտագործած «քյոհնա» բառի մասին

Իրանագետ Վարդան Ոսկանյանը Facebook-ի իր էջում անդրադարձել է նախօրեին վարչապետ Նիկոլ Փաշինյանի կողմից օգտագործված «քյոհնա» բառին. հայտնում է Yerkir.am-ը:

Նա, մասնավորապես, նշել է.

«Քանի որ ամբողջ ֆեյսբուքը «քյոհնա» բառն է քննարկում, ասեմ, որ իրանական ծագման բառ է, հմմտ․՝ դասական նոր պարսկերեն کهنه [kuhna], ժամանակակից պարսկերեն արտասանությամբ [kohne], բայց դատելով ö [յո]-ից՝ հայերեն բարբառներ է մուտք գործել թյուրքական միջնորդությամբ` հմմտ․՝ ադրբեջաներեն köhnə, եւ բոլոր լեզուներում նշանակում է «հին»։

Երեւանում կարծես թե կիրառվում է միայն մեկ, այն էլ հայհոյական բառակապակցության մեջ»:

Հիշեցնենք՝ նախօրեին ՀՀ վարչապետ Նիկոլ Փաշինյանը լուսանկար էր հրապարակել Ծաղկաձորից ու գրել. «Քյոհնա քեֆչիների նման՝ Ծաղկաձորում «օբյեկտից օբյեկտ» ենք անցնում, հիանում ու զարմանում մեր գործարարների տաղանդի վրա, քաջալերում նրանց»: