Կորոնավիրուսին հաղթելու համար մենք ունենք բոլոր անհրաժեշտ հնարավորություններն ու ռեսուրսները. Չինաստանի ԱԳՆ

Չինաստանը տիրապետում է բոլոր անհրաժեշտ հնարավորություններին և ռեսուրսներին կորոնավիրուսի նոր տեսակով պայմանավորված թոքաբորբի համաճարակը կանգնեցնելու համար. ըստ Yerkir.am-ի՝ հայտնում է ՌԻԱ «Նովոստի»-ն՝ Առողջապահության համաշխարհային կազմակերպության ղեկավարի հետ հանդիպման ժամանակ Չինաստանի արտգործնախարար Վան Ինի հայտարարությանը հղումով:

«Ցանկանում եմ վստահեցնել Ձեզ, որ Չինաստանն ունի կորոնավիրուսի նկատմամբ շուտափույթ հաղթանակ տանելու բոլոր հնարավորությունները, ռեսուրսներն ու վստահությունը»,- պարզաբանել է պաշտոնյան:

Իր հերթին ԱՀԿ ղեկավար Թեդրոս Ադան Գեբրեյեսուսը մանրամասնել է, որ Չինաստանին հաջողվել է ռեկորդային կարճ ժամանակահատվածում գտնել թոքաբորբի համաճարակ առաջացրած պաթոգենը:

«Համաճարակի ամենասկզբից Չինաստանն անմիջապես պարզեց պաթոգենը: Դա ռեկորդային կարճ ժամանակ էր, և մենք, միջազգային հանրությունը բարձր ենք գնահատում այդ փաստը»,- ասել է ԱՀԿ ղեկավարը:

Վերջին տվյալներով՝ կորոնավիրուսով վարակվածների թիվը Չինաստանում հասել է 4515-ի, մահացել է ավելի քան 106 մարդ:

Մայրցամաքային Չինաստանի սահմաններից դուրս վարակման դեպքեր են գրանցվել նաև Հոնկոնգում, Մակաոյում, Թայվանում, Թաիլանդում, Ճապոնիայում, Հարավային Կորեայում, ԱՄՆ-ում, Կանադայում, Վիետնամում, Սինգապուրում, Նեպալում, Ֆրանսիայում, Ավստրալիայում, Մալայզիայում ու Գերմանիայում: