ԱԳՆ-ն պատրաստ է Իրանի հետ համագործակցությամբ ձեռնարկել կորոնավիրուսին առնչվող բոլոր քայլերը

ՀՀ արտաքին գործերի նախարարությունը պատրաստ է անհրաժեշտության դեպքում Իրանի գործընկերների հետ սերտ համագործակցությամբ ձեռնարկել կորոնավիրուսի առնչությամբ բոլոր անհրաժեշտ քայլերը: «Արմենպրես»-ի հարցին ի պատասխան այս մասին հայտնել են արտաքին գործերի նախարարությունից:

«Արդեն իսկ առկա է նման իրադրություններում գործողությունների ձևավորված համակարգ, և, անհրաժեշտության դեպքում, Իրանի մեր գործընկերների հետ սերտ համագործակցությամբ կձեռնարկվեն բոլոր անհրաժեշտ քայլերը։ ՀՀ սահմանային անցակետերում նոր տիպի կորոնավիրուսի հետ կապված հսկողությունը շարունակվում է»,- հայտնել են ԱԳՆ-ից:

Yerkir.am-ն ավելի վաղ տեղեկացրել էր, Իրանում կորոնավիրուսի հետևանքով 2 մահվան դեպք էր գրանցվել, իսկ ըստ վերջին տվյալների՝ երկրի տարածքում արդեն 5 վարակակիր կա, որոնք գտնվում են կարանտինային ռեժիմում: