Ամերիկյան «քաջագործությունը» Սիրիայում կե՞ղծ էր

ԱՄՆ նախկին նախագահներ Ռոնալդ Ռեյգանի և Բարաք Օբամայի պաշտոնավարման ժամանակ Սպիտակ տան պաշտոնական լուսանկարիչ Պիտ Սոուզան անդրադարձել է Դոնալդ Թրամփի մասնակցությամբ լուսանկարին, որն, ըստ լրատվամիջոցների, պատկերում է այն դրվագը, երբ ԱՄՆ ղեկավարությունը հետևում է հոկտեմբերի 26-ին ամերիկյան հատուկջոկատայինների իրականացրած գործողությունը՝ ուղղված «Իսլամական պետություն» ահաբեկչական կառույցի առաջնորդ Աբու Բաքր ալ Բաղդադիի ոչնչացմանը: Լուսանկարում, բացի Թրամփից, ԱՄՆ փոխնախագահ Մայք Փենսն է, Ազգային անվտանգության հարցերով խորհրդական Ռոբերթ Օ՛Բրայանը, Պենտագոնի ղեկավար Մարկ Էսպերը, ԱՄՆ շտաբերի պետերի միացյալ կոմիտեի ղեկավար Մարկ Միլլին և բրիգադային գեներալ Մարկուս Էվանսը:

Սոուզային է պատկանում այն հայտնի լուսանկարը, որում նախագահ Օբաման և պետքարտուղար Հիլարի Քլինթոնը մի շարք ղեկավար անձանց հետ հետևում էին ԱՄՆ թիմ մեկ թշնամի Ուսամա Բեն Լադենի վերացման գործողությանը:

Թվիթերյան էջում Սոուզան գրում է, որ «գործողությունը սկսվել է ցերեկը 3.30-ին, իսկ լուսանկարն արվել է 17.05-ին՝ ըստ լուսանկարի ամսաթվի»: Բացի այդ՝ Թրամփի լուսանկարում երևում է, որ ամեն բան ավելի համաչափ  և կազմակերպված է, քան Օբամայի լուսանկարում:

Ուշագրավ մեկ բան ևս՝ Թրամփի լուսանկարում երևում է, որ համակարգիչների մի մասը նույնիսկ միացված չէ, և լարերից շատերն անիմաստ են դրված՝ պահի պատկեր ստեղծելու համար:

Իհարկե, ընդհանուր առմամբ, մոտ 20 անգամ սպանված ալ Բաղդադիի սպանության մասին հերթական լուրերն այդքան էլ արժանահավատ չեն, քանի որ ԱՄՆ-ը հավաստի ոչ մի փաստ չի հրապարակում, իսկ Ռուսաստանը, որը Սիրիայում գործող գլխավոր ուժն է, հայտարարում է, որ ոչ մի տեղեկություն չունի այդ դեպքի վերաբերյալ: