Թուրքիան և Ռուսաստանն ավելի վտանգավոր են Սիրիայում գտնվող ամերիկյան զորքերի համար, քան ԻՊ-ը. The New York Times

Հյուսիսային Սիրիայում ԱՄՆ նախագահ Թրամփի վարչակազմի՝ արագ փոխվող մարտավարությունը ստիպում է այնտեղ գտնվող ամերիկյան զորամիավորումների հրամանատարներին արագ միջոցներ ձեռնարկել, որպեսզի պաշտպանեն իրենց զորքերը Թուրքիայի, Ռուսաստանի, Իրանի և սիրիական կառավարության ռազմական միավորումների գործողությունների սպասվող ակտիվացումից: Ամերիկացի զինծառայողների կարծիքով՝ դրանք ներկայումս ավելի վտանգավոր են, քան ԻՊ-ի մարտական ջոկատները, որոնց դեմ պայքարելու էլ իրենց ուղարկել էին. ըստ Yerkir.am-ի՝ գրում է The New York Times-ը՝ Պենտագոնում իր աղբյուրին հղումով:

Ամերիկացի հրամանատարները խնդրել են հանձնարարականներ տալ իրենց, թե ինչպես պետք է արձագանքեն տարբեր զինված միավորումների հարձակումներին, այդ թվում՝ Ռուսաստանի աջակցությունը վայելող սիրիական կառավարական զորքերի, որոնք նախկինում էլ փորձել են գրավել տարածքները, որոնք վերահսկվում են ԱՄՆ-ի կողմից: Սակայն, ըստ թերթի աղբյուրի, Պենտագոնն այնպես էլ հստակ պատասխան չի տվել նրանց:

Ներկայումս ամերիկյան հրամանատարությունը միջոցներ է ձեռնարկում, որ խուսափի Եփրատի դաշտավայրում այլ զորքերի հետ բախումներից, ընդ որում՝  այդ գործում զգալիորեն վստահում է ցածրաստիճան հրամկազմի ինտուիցիային, նախազգուշական զանգերին Ռուսաստանի և Թուրքիայի պաշտոնատար անձանց և օդից դիտարկումներին, որոնք, սակայն, եղանակային վատ պայմաններում դժվար է իրականացնել:

«Այդ զորքերը գտնվում են վտանգի մեջ՝ առանց հստակ հասկանալու, թե ինչ նպատակի պետք է հասնեն, և առանց իրենց երկրի քաղաքական աջակցության, եթե կամ, ավելի հավանական է, երբ ԱՄՆ-ի հակառակորդներից մեկը որոշի նրանց վրա հարձակվել»,- կարծիք է հայտնել Վաշինգտոնի Պատերազմի հիմնախնդիրների ուսումնասիրման ինստիտուտի տնօրեն Ջենիֆեր Կաֆարելան: