Մինչ 3000 տոննա խեցգետին. սահմանվեց ջրային տարածքներում 3 կենդանատեսակների որսի չափաքանակը

ՀՀ բնապահպանության նախարար Արծվիկ Մինասյանը այսօր՝ փետրվարի 7-ին հրաման է ստորագրել 2017թ. ընթացքում ՀՀ ջրային տարածքներում արդյունագործական որսի չափաքանակները սահմանելու մասին. 

«1. Հայաստանի Հանրապետության ջրային տարածքներում 2017 թվականի ընթացքում սահմանել կարաս, ծածան և խեցգետին կենդանատեսակների արդյունագործական որսի հետևյալ չափաքանակները.

1.  Կարաս` մինչև 100 տոննա,
2.  Ծածան` մինչև 100 տոննա,
3.  Խեցգետին` մինչև 3000 տոննա, որից Սևանա լճում՝ 1100 տոննա:

2. Հայաստանի Հանրապետության բնապահպանության նախարարության աշխատակազմի կենսառեսուրսների կառավարման գործակալության պետին` կենդանական պաշարների օգտագործման մասին պայմանագրերի կնքման գործընթացը կազմակերպելիս հիմք ընդունել սույն հրամանի 1-ին կետում նշված չափաքանակները:

3.  Հայաստանի Հանրապետության բնապահպանության նախարարության աշխատակազմի բնապահպանական պետական տեսչության պետին`

1. սահմանված կարգով վերահսկողություն իրականացնել Հայաստանի Հանրապետության ջրային տարածքներում արդյունագործական ձկնորսության նկատմամբ,
2. ուժեղացնել վերահսկողությունն իշխան, կողակ և սիգ ձկնատեսակների ապoրինի որսի և վաճառքի կանխարգելման ուղղությամբ` համագործակցելով Հայաստանի Հանրապետության իրավապահ մարմինների հետ»: