Գախարիան առաջադրվել է Վրաստանի վարչապետի պաշտոնում. պաշտոնական

Վրաստանի կառավարությունը կղեկավարի երկրի  ՆԳ գործող նախարար Գեորգի Գախարիան: Նրան այսօր վարչապետի պաշտոնում առաջադրել է «Վրացական երազանք» իշխող կուսակցության առաջնորդ Բիձինա Իվանիշվիլին․ հաղորդում է «Նովոստի Գրուզիան»:

Հիշեցնենք, որ Վրաստանի վարչապետի պաշտոնը մեկ տարուց ավելի զբաղեցրած Մամուկա Բախտաձեն երկուշաբթի հայտարարել էր հրաժարականի մասին: Որպես հրաժարականի պատճառ՝ նա նշել էր, որ կատարել է իր առջև կուսակցության կողմից դրված բոլոր նպատակներն ու խնդիրները:

«Վրացական երազանքն» այսօր առավոտյան քաղխորհրդի նիստ էր գումարել, որից հետո հայտարարություն էր  տարածել վարչապետի պաշտոնում թեկնածություն առաջադրելու վերաբերյալ:

««Վրացական երազանք-Ժողովրդավարական Վրաստան» կուսակցության քաղխորհրդի նիստում ես՝ որպես նախագահ, նոր վարչապետի պաշտոնում առաջադրել եմ Գեորգի Գախարիայի թեկնածությունը և լիակատար աջակցություն եմ ստացել: Այնուհետև հանդիպել ենք մեծամասնության հետ, որի ժամանակ հարցեր չեն տրվել: Լրագրողները և հանրությունը Գեորգի Գախարիային լավ են ճանաչում: Իմ համոզմամբ՝ նա իր գործունեությամբ՝ սկսելով բիզնես օմբուդսմենից, այնուհետ՝ էկոնոմիկայի նախարար, ՆԳ նախարար, վաստակել է այս պաշտոնին առաջադրվելու հնարավորությունը: Կարծում եմ, որ խորհրդարանն անպայման նրան կհաստատի»,- ասել է Բիձինա Իվանիշվիլին:

Ակնկալվում է, որ Գախարիան արդեն այսօր Վրաստանի խորհրդարանին կներկայացնի կառավարության կազմը և ծրագիրը: